काठमाडौँ। भारतमा जारी आइसिसी टी-ट्वान्टी विश्वकपको पहिलो खेलमा नेपाल दुईपल्टको विश्व विजेता इङ्ल्यान्डसँग मात्र चार रनले पराजित भएको छ। जितको निकै नजिक पुगेर पनि पराजित भएपछि नेपाली टोलीमा ठूला राष्ट्रसँग खेल्ने अनुभवको कमी रहेको चर्चा हुन थालेको छ।

पत्रकार सम्मेलनमा कप्तान रोहित पौडेलले पनि आफूहरूले टेस्ट राष्ट्रहरूसँग खेल्ने पर्याप्त अवसर नपाएको कुरालाई सहजै स्वीकार गरेका छन्। गत विश्वकपमा दक्षिण अफ्रिकासँग एक रनले पराजित भएको नेपालले यसपटक पनि त्यस्तै नियति भोग्नुपरेको छ। कप्तान रोहितले भारत, अस्ट्रेलिया र इङ्ल्यान्डजस्ता बलिया टोलीलाई टियु क्रिकेट मैदानमा स्वागत गर्न नेपाली समर्थकहरू आतुर रहेको बताएका छन्।

नेपाल क्रिकेट संघ (क्यान) का उपाध्यक्ष रोशन सिंहले सन् २०२२ देखि नै टेस्ट राष्ट्रहरूलाई नेपाल ल्याउने प्रयास भइरहेको जानकारी दिएका छन्। उनले श्रीलंका र अफगानिस्तानजस्ता टोलीलाई ल्याउन पहल गरिए पनि व्यस्त कार्यतालिकाका कारण योजना सफल हुन नसकेको बताए।

एसिया कपका क्रममा श्रीलंकाली बोर्ड र एसिसीका पदाधिकारीसँग भएका छलफल सकारात्मक रहेकाले भविष्यमा सहकार्य हुनेमा उनी विश्वस्त छन्। गत वर्ष वेस्ट इन्डिजसँगको शृङ्खलाले खेलाडीको आत्मबल बढाएको उल्लेख गर्दै सिंहले कप्तान रोहितले भनेझैँ ठूला राष्ट्रलाई नेपाल ल्याउन थप पहल गरिने प्रतिबद्धता जनाएका छन्।

मुम्बईको वाङ्खेडे स्टेडियममा नेपाली समर्थकको उत्साहजनक उपस्थिति देखेर आइसिसी र एसिसीका पदाधिकारीहरूले समेत नेपालको क्रिकेट क्रेजको प्रशंसा गरेका छन्।

इङ्ल्यान्डविरुद्ध नेपाली खेलाडीले देखाएको उत्कृष्ट प्रदर्शनले विश्व क्रिकेटको नजर नेपालमा परेको र यसले नेपाली खेलाडीलाई ठूला फ्रेन्चाइज लिगमा अवसर दिलाउन मद्दत पुग्ने सिंहको विश्वास छ। उनले नेपाली टोलीमा क्षमता रहेको र यदि नेपाल सुपर आठमा पुग्न सके नेपाली क्रिकेटले ठूलो फड्को मार्ने दाबी गरे। समूह ‘सी’ मा रहेको नेपालले अब बिहीबार आफ्नो दोस्रो खेलमा इटालीसँग प्रतिस्पर्धा गर्दैछ।