सर्लाही । सर्लाहीमा यस वर्षको एसईईको प्रश्नपत्र बाहिर लाने प्रयास गरेको अभियोगमा एक जनालाई प्रहरीले पक्राउ गरेको छ । पक्राउ पर्नेमा कविलासी नगरपालिका–५ पचगछियाका २४ वर्षीय मनोज कुमार यादव रहेका छन्।
सर्लाही जिल्ला प्रहरी कार्यालयका अनुसार, यादवलाई सोही पालिकाको वडा नम्बर २ पिपरियास्थित श्री बाल गोविन्द जनता माध्यमिक विद्यालय परीक्षा केन्द्र बाहिर बिहीबार पक्राउ गरिएको हो।
परीक्षा शुरू भएको केही मिनेटमै (८ः९) उनी परीक्षा केन्द्रबाहिर बसिरहेको अवस्थामा नियन्त्रणमा लिइएको थियो।
उनको मोबाइलमा परीक्षा भइरहेको अनिवार्य अंग्रेजी विषयको प्रश्नपत्रका ६ पाना भेटिएको प्रहरीले जनाएको छ । पक्राउ परेका यादवमाथि परीक्षा सम्बन्धी कसुर मुद्दा दर्ता गर्दै सर्लाही जिल्ला अदालतले ३ दिनको म्याद थप गरी अनुसन्धान अघि बढाउन आदेश दिएको छ ।
सर्लाही प्रहरीले परीक्षा शान्ति र निष्पक्षताको सुनिश्चितताका लागि थप निगरानी जारी राखेको जनाएको छ ।
