जथाभावी बाटो काटे दुई सय जरिवाना, पैसा नभए रातभर कठघरामा बास

प्रकाशित मिति : २०७४ बैशाख ४ सोमबार

काठमाडौं । काठमाडौंलाई ‘हर्न निषेधित क्षेत्र’ बनाउने अभियान सुरु गरेको ट्राफिक प्रहरीले अब जथाभावी बाटो काट्ने पैदलयात्रुलाई पनि कारवाही गर्ने तयारी गरेको छ ।

महानगरीय ट्राफिक प्रहरी महाशाखाले वैशाखको अन्तिमदेखि यो नियम लागू गर्न लागेको हो । 

नियम उल्लंघन गर्ने पैदल यात्रुलाई पनि कारवाही गर्ने तयारी भइरहेको महाशाखाका डिआइजी मिङमार लामाले जानकारी दिए ।

जथाभावी बाटो प्रयोगले ४० प्रतिशतको मृत्यु

जथाभावी बाटो काट्दा सडक दुर्घटना बढी हुने गरेकोले यो नियम लागू गर्न लागिएको ट्राफिक प्रहरीको भनाइ छ ।

उपत्यकामा मोटरसाइकल र स्कुटी गरी ६ वर्षको अवधिमा १८ हजार ८ सय ९१ वटा दुर्घटना भएको छ । 

ती घटनामा मृत्यु हुनेमध्ये ४० प्रतिशत जथाभावी बाटो प्रयोग गर्ने रहेको डिआइजी लामाले बताए ।

उल्लंघन गर्नेलाई दुईसय जरिवाना

नयाँ नियम लागू भएपछि अब पैदल यात्रुले निर्धारित ठाउँबाट मात्र हिँड्नु पर्ने हुन्छ । 

अबदेखि जेब्राको प्रयोग, ओभरहेड तथा तोकिएको बाटोबाट मात्र पैदल यात्रुले हिँड्नु पर्छ । सो नियम उल्लंघन गर्ने पैदल यात्रुलाई पनि कारवाही हुने ट्राफिक प्रहरीले जनाएको छ ।

यो नियम उल्लंघन गर्ने पैदल यात्रुलाई दुई सय रुपैयाँ जरिवाना गरिने डिआइजी लामाले बताए ।

 ‘पैसा नभए उल्लंघनकर्ताले छुट भने पाउने छैनन्,’ उनले भने, ‘उनीहरु त्यसको साटो रातभरी प्रहरी कठघरामा बस्नुपर्ने हुन्छ ।’ (नयाँ पत्रिका दैनिक)

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ