काठमाडौं । रुस विश्वकपमा फ्रान्सलाई औस्माने डिम्बलेको चिन्ता थपिएको छ । बार्सिलानाका स्ट्राइकरको विषयमा सार्वजनिक भएको विवरणले फ्रान्सको चिन्ता बढाएको हो ।
बार्सिलोनाले अहिले डिम्बलेको दायाँ गोलिगाँठोमा चोट रहेको विवरण सार्वजनिक गरेसँगै उनको प्रदर्शन यो विश्वकपमा कस्तो रहने हो भन्ने विषयमा आशंका देखिएको हो ।
आइतबार बार्सिलोनाको रियल सोसाइडेडसँगको खेलको क्रममा उनी केही समयमा नै मैदानबाट बाहिरिन पुगेका थिए । पहिलो हाफको अन्तिम समयमा मैदानबाट बाहिरिएका डिम्बलेको दायाँ गोलीगाँठोमा चोट देखिएको परीक्षणपछि खुलेको हो ।
आइतबार बार्सिलोनाले सार्वजनिक गरेको विवरणमा डिम्बलेको विषयमा केही आशंकाहरु देखिएका हुन् । २१ वर्षीय खेलाडीले यो सिजनमा विभिन्न किसिमको चोटको कारण अवरोधहरुको सामना गर्दै आएका छन् । यद्यपि यसपटकको विश्वकपको लागि भने उनी प्ररम्भिक टोलीमा अटाइसकेका छन् ।
डिम्बलेलाई बार्सिलोनाको मेडिकल स्टाफले अबको केही दिनसम्म निगरानी गर्ने बताइएको छ । फ्रान्सले यस विश्वकपको पहिलो खेल जुन १६ मा अष्ट्रेलियाविरुद्ध खेल्नेछ ।
