भेनेजुएला प्रकरणमा नेकपाको ढाकछोप नीति, आफ्नै देशबारे ट्रम्पले बोल्दा किन पत्तो पाएन नेकपाले ?  

प्रकाशित मिति : २०७५ माघ २२ मंगलबार
तस्वीर –फाइल

काठमाडौँ । सत्ताधारी दल नेपाल कम्युनिष्ट पार्टी (नेकपा) ले भेनेजुएला प्रकरणमा ढाकछोप नीति लिएको छ । नेकपा अध्यक्ष पुष्पकमल दाहाल प्रचण्डले जारी गरेको खरो विज्ञप्तिको ढाकछोप गर्ने क्रममा सचिवालय बैठकले नरम शैलीमा पार्टीको धारणा स्पष्ट पारेको हो । 

सचिवालय बैठकले यसअघि प्रचण्डले जारी गरेको विज्ञप्तिको समीक्षा गर्दै कुनै पनि देशको आन्तरिक मामिलामा बाह्य हस्तक्षेप हुन नहुने धारणा अगाडि बढाएको हो । 
 
ढाकछोप गर्ने क्रममा प्रचण्डले सीधै अमेरिकालाई हस्तक्षेप नगर्न चुनौती दिएका थिए । तर सचिवालय बैठकले भेनेजुएलाका जनताको सार्वभौम अधिकारको सम्मान हुनुपर्ने धारणा मात्र राखेको छ । 

नेकपा प्रवक्ता नारायणकाजी श्रेष्ठले आफ्नो पार्टीले हरेक देशको सार्वभौमसत्ता, स्वतन्त्रता र भौगोलिक अखण्डतालाई सम्मान गने र कुनै पनि देशको आन्तरिक मामिलामा बाह्य हस्तक्षेप हुन नहुने बताएका छन् । 

प्रधानमन्त्री केपी शर्मा ओलीका परराष्ट्र मामिला सल्लाहकार डा राजन भट्टराईले पनि हस्तक्षेप नहोस् भन्ने नै रहेको खुलाएका छन् । उनी नेपाल मिडियामाथि खनिएका छन् । कुरै नबुझी भाषा बङ्ग्याएर अगाडि बढेको भनिरहेका छन् । 

उनले भनेका छन् –सार्वभौमसत्ता सम्पन्न जनताको पक्षमा फैसला भएको ठाउँमा बाह्य हस्तक्षेप हुनु हुँदैन भनी भन्दा किन यति सारो गरिएको हो ? 

भट्टराईले आफूहरुले अमेरिकाको विरोध नगरेको भन्दै अगाडि भने, ‘हामीले त हाम्रो संविधान र विदेश नीतिका आधारमा हाम्रो विचार दिएका हौं ।’

उनले अमेरिकासंग विभिन्न च्यानलबाट सम्पर्क भइरहेको भन्दै यो विज्ञप्तिले कुनै असर नपरेको दावी गरेका छन् । 

उनले समस्या अमेरिकाबाट छैन नेपालको एउटा तह र तप्का छ जसले दुई तिहाइको सरकारलाई कुनै विवादमा फसाएर ढाल्न सकिन्छ कि भनेर लागिरहेको आरोप लगाए ।  

प्रधानमन्त्री एवं नेकपाका अध्यक्ष स्वीटजरल्याण्डबाट नेपाल फर्कने क्रममा रहँदा नेपालबाट अर्का अध्यक्ष प्रचण्डले भेनेजुएलाका वर्तमान राष्ट्रपतिको पक्ष लिँदै अमेरिकालाई सार्वभौमसत्ता राष्ट्रको बारेमा हस्तक्षेप नगर्न चेतावनी दिएका थिए । 

आफ्नै देशबारे ट्रम्पले बोल्दा किन पत्तो पाएन नेकपाले ? 
अमेरिकी राष्ट्रपति डोनाल्ड ट्रम्पले भेनेजुएलाका विपक्षी दलका नेता हुँवा गुवाइदोले आफूलाई स्वघोषित राष्ट्रपति बनाउँदा स्वीकार गरे । त्यस्तै युरोपियन युनियनका १७ देशले पनि गुवाइदोलाई समर्थन गरेका छन् । 

त्यो समर्थनको विरोध गर्दैै निर्वाचित राष्ट्रपति निकोलस मादुरोको पक्षमा प्रचण्ड बोलेका थिए । भेनेजुएला नेपालभन्दा धेरै टाढाको राष्ट्र । जसले प्रत्यक्ष नेपालको विकास र समृद्धिमा हातेमालो गरेको छैन । 

र पनि प्रचण्डले अमेरिकाप्रति चेतावनीयुक्त शब्दहरु खर्चिए । तर ट्रम्पले नेपाल भारतको एक भाग हो भनी भाषण गर्दा किन नेकपाले बोलेको छैन ? 

आफ्नै देशका बारेमा बोल्दा भने अमेरिका र ट्रम्पको विरोध गर्न यत्रो दुई तिहाइ सरकारलाई कसले रोकेछ ? 

नेकपाले संयुक्त राष्ट्रसंघको बडापत्र र पञ्चशीलका सिद्धान्तप्रति सदा प्रतिबद्ध रहँदै आएको उल्लेख गरेको छ। तर के अमेरिकाले नेपाललाई भारतको भूमि हो भन्दा त्यो चाहीं पञ्चशील र राष्ट्रसंघभन्दा टाढाको कुरा भयो ? 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ