झापामा बिहिबार होली, सार्वजनिक विदा उल्टाउन नसक्दा अन्योल कायमै

युबराज रेग्मी, प्रकाशित मिति : २०७५ चैत ६ बुधबार

झापा । सरकारले झापासहित पहाडका ५८ जिल्लामा फागुपूर्णिम अर्थात होली पर्वको सार्वजनिक विदा चैत ६ गतेका लागि उल्लेख भए पनि चैत ७ गते सार्वजनिक बिदा दिइने निर्णय गरेको छ  । केही वर्षदेखि झापालाई तराईबाट अलग्याएर पहाडसँगै सार्वजनिक बिदा दिन थालेपछि होली पर्वको विदा विवादमा रहदै आएको  थियो । जसका कारण झापा पहाडकी तराई ? झापामा होली आज कि भोलि ? जस्ता समाचारहरु सञ्चारमाध्यममा व्यापक हुन थालेको थियो । यस्तो परिस्थितिलाई सम्बोधन गर्दै सरकारले  तराईको जिल्ला सरह झापामा चैत ७ गते बिहीबार सार्वजनिक विदा दिइएको हो ।

झापाका प्रमुख जिल्ला अधिकारी जनकराज दाहालका अनुसार बुधबार सरकारी कार्यालय खुल्ला रहने छन् भने बिहीबार कार्यालय विदा हुने छन् । गृहले विदाको निर्णय सच्याएको विषयमा प्रजिअ दाहाल समक्ष प्रश्न राख्दा उनले भने, ‘भोलि खुल्ला हो, पर्सी बन्द हो, अहिले त्यति नै बुझ्नुहोस ।’ यता प्रशासन स्रोतका अनुसार झापाबासी बिहीबार होली मनाउने हुदाँ गृहकै आदेशमा बुधबारको विदा रद्द गरी बिहीबार विदा दिन प्रशासन कार्यालय झापालाई आदेश दिएको हो ।

संघीय सरकारले गरेको सार्वजनिक विदा उल्टाउन नसक्दा आन्तरिक  निर्णय बमोजिम झापाका केही स्थानीय तहले दुई दिन नै होलीको बिदा दिएका छ्न्  । बुधवार खुल्ला होइन सार्वजनिक बिदा भन्नेमा झापाका १५ वटै स्थानीय सरकार जानकार छन् । तर, अन्तिम समयमा आएर झापा प्रशासनले सार्वजनिक बिदाको मिति परिर्वतन गर्दा स्थानीय तहमा भ्रम जस्ताको त्यस्तै छ ।

कतिपय स्थानीय तहले बुधबार विदा दिएका छन् भने कतिपयले बुधबार र बिहीबार दुवै दिन बिदा दिएका छन् । स्थानीयको परम्परागत धार्मिक रितीरिवाज अनुसार पहाडमा मनाउने भोलिपल्ट झापामा होली मनाउने चलन बमोजिम भद्रपुर नगरपालिका, गौरादह नगरपालिका, कचनकवल गाउँपालिका, गौरीगञ्ज गाउँपालिकाले बिहीबार स्थानीय विदा दिएको जनाइएको छ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ