मदन भण्डारीको मर्ममाथि प्रहार गर्दै ओली पार्टीको राजनीतिक प्रतिवेदनबाट ‘बहुदलीय’ हटाउन तयार,  ‘जनताको जनवाद’ मा सहमति

के भयो खोइ ईश्वर पोखरेललाई ? 

प्रकाशित मिति : २०७६ असार २३ सोमबार

काठमाडौं । नेपाल कम्युनिष्ट पार्टी (नेकपा) को राजनीतिक प्रतिवेदनमा जनताको बहुदलीय जनवाद भन्ने मदन भण्डारीको नीतिलाई अध्यक्ष केपी शर्मा ओलीले त्याग्न तयार भएका छन् । 

पहिलेदेखि नै तत्कालीन नेकपा एमालेले जनताको बहुदलीय जनवादलाई अंगीकार गरे पनि आफ्नो सत्ता बचाउन ओलीले मदन भण्डारीको मर्ममा प्रहार गर्दै नेकपाको राजनीतिक प्रतिवेदन प्रकाशन गर्ने विषयमा ओली र अर्का अध्यक्ष पुष्पकमल दाहाल ‘प्रचण्ड’बीच सहमति जुटाएका हुन् । 

सचिवालयको बैठकमा राजनीतिक प्रतिवेदन परिमार्जन गरेर जनताको बहुदलीय जनवाद राख्नुपर्ने विषय प्रवेश भएपछि विवाद सुरु भएको थियो । राजनीतिक प्रतिवेदनमा अब ‘जनताको जनवाद’ लेखिनेछ, बीचमा ‘बहुदलीय’ लेखिने छैन ।

पार्टी एकीकरण भएको १३ महिनापछि राजनीतिक प्रतिवेदन प्रकाशित हुन लागेको हो । पार्टीको विधान र नियमावली लगायतका दस्तावेज प्रकाशित भएर कार्यान्वयनमा पुगेपनि विवादकै कारण राजनीतिक प्रतिवेदन प्रकाशित हुन सकेको थिएन । 

पार्टी एकता हुनुपूर्व नै भएको सहमति विथोल्ने गरी सचिवालय बैठकमा सचिवालय सदस्य ईश्वर पोखरेले ‘जनताको बहुदलीय जनवाद’ राख्नुपर्ने प्रस्ताव गरेपछि पार्टीभित्र विवाद सुरु भएको थियो । जनताको बहुदलीय जनवाद एवं जनयुद्धजस्ता शब्द र कतिपय राजनीतिक कार्यदिशाका विषयमा सहमति जुटेको थिएन ।

अध्यक्षद्वय ओली र प्रचण्डबीच आइतबार बालुवाटारमा भएको छलफलपछि राजनीतिक प्रतिवेदनका विवादित विषयमा सहमति जुटेको छ । एक वर्षअघि नै राजनीतिक प्रतिवेदन, विधानलगायतका दस्तावेज अध्ययन गरेर सम्पादन गर्ने जिम्मा अध्यक्षद्वयलाई दिइएको थियो । तर यस विषयमा दुई अध्यक्षबीच छलफल भएपनि सहमति जुट्न सकेको थिएन ।

नेकपामा पार्टीको तत्कालीन कार्यक्रम जनताको बहुदलीय जनवाद कि जनताको जनवाद भन्ने बहससमेत चलेको थियो । पछिल्लो पटक मदन भण्डारी जयन्तीका अवसरमा अध्यक्ष ओलीले जनताको बहुदलीय जनवाद नै अब जनताको जनवाद भएको अभिव्यक्ति दिएका थिए । 

सोही आधारमा राजनीतिक प्रतिवेदनमा सहमति जुटेको नेताहरुले बताएका छन् । सचिवालय बैठकमा राजनीतिक प्रतिवेदनमाथि विवाद सुरु भएपछि बहुमत सदस्यहरुले पूर्व सहमतिअनुसार नै राजनीतिक प्रतिवेदन प्रकाशित गर्नुपर्ने अडान लिएका थिए ।

ईश्वर पोखरेलले प्रतिक्रिया जनाएका छैनन् । तर अध्यक्षद्धय नै मिलेपछि पोखरेलको के जोर चल्नु ? ओलीले नै पोखरेललाई विचार सम्प्रेषण गर्न अगाडि बढाएका थिए । 

अहिले भने निहित स्वार्थका लागि ओलीले बहुदलीय शब्द हटाउन तयार भएका थिए । पोखरेल ‘पेन्डुलम’ भएका छन् । 

त्यसो त यो सहमतिमा वरिष्ठ नेता माधवकुमार नेपाल पक्ष असन्तुष्ट छ । पार्टी भागबण्डा गर्दा ६०–४० देखि ७०–३० सम्म गरे पनि अहिले भने ओलीले आफ्नो अडानलाई कायम राख्न नसक्दा तत्कालीन माओवादी केन्द्रको पक्षमै सहमति भएको हो । 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ