मौद्रिक नीतिमा विश्वले भोगिरहेको आर्थिक समस्याबारे चासो राख्न सुझाव, ऐतिहासिक छलफलमा ३ पूर्व गभर्नर अनुपस्थित

प्रकाशित मिति : २०७६ असार २६ बिहिबार

काठमाडौं । नेपाल राष्ट्र बैंकले आसन्न मौद्रिक नीतिबारे सुझाव लिनको लागि पूर्व गभर्नरहरुलाई बोलाएको छ । मौद्रिक नीति ल्याउनुपूर्व बैंकहरुको मर्जर सम्बन्धी नीति, हरेक वर्षजस्तो देखिने तरलताको समस्या समाधानको उपाय लगायतको बारेमा छलफल गर्नको लागि यस्तो बैठक बोलाएको हो । बिहीबार दिउँसो १ बजे लाजिम्पाट स्थित होटल र्याडिसनमा बोलाईएको कार्यक्रममा छ जना पूर्व गभर्नरहरुको सहभागिता थियो। होटलमा भएको सो बैठकमा राष्ट्र बैंकका संस्थापक गभर्नर हिमालय शम्शेर जवरा देखि पूर्व गभर्नरहरु भेष बहादुर थापा, गणेश बहादुर थापा, तिलक बहादुर रावल, दीपेन्द्रपुरुष ढकाल र विजयनाथ भट्टराई सहभागी थिए ।

पूर्व गभर्नरहरु सत्येन्द्रप्यारा श्रेष्ठ र दीपेन्द्र बहादुर क्षेत्री भने कार्यक्रममा सहभागी भएनन् । अर्का पूर्व गभर्नर युवराज खतिवडा भने अर्थमन्त्री रहेकोले गभर्नरले बोलाएको बैठकमा सहभागी भएनन् । राष्ट्र बैंकको इतिहासमा पहिलो पटक पूर्व गभर्नरहरुसँग मौद्रिक नीतिको बारेमा छलफल गरेको राष्ट्र बैंकले यही साउनको पहिलो साता मौद्रिक नीति ल्याउने तयारी गरेको छ । उपस्थित पूर्वगभर्नरहरुले राष्ट्र बैंकको यो प्रयासलाई सकारात्मक मानेका छन्। 

बैठकमा सहभागी नेपाल राष्ट्र बैंकका पूर्व गभर्नर भेष बहादुर थापाले बैठकमा सबै पूर्व गभर्नरहरुले आ आफ्नो अनुभव सुनाएको बताए । राष्ट्र बैंकले इतिहासको विभिन्न कालखण्डमा देखिएका समस्या र त्यतिबेला अपनाईएका समाधानको उपायबारे छलफल भएको बताए । 

थापाका अनुसार अहिलेको वित्तीय क्षेत्रको समस्याबारे पनि बैठकमा गहन छलफल भएको छ । उनले व्यक्तिगत रुपमा भन्दा पनि सबै पूर्व गभर्नरहरुले आ आफ्नो कार्यकालमा देखिएका समस्याहरुलाई कसरी समाधान गरिएको थियो ? भन्नेबारेमा अनुभव सुनाईएको बताए । 

बैठकमा नेपालको समस्यामात्रै नभएर विश्वमा देखिएको आर्थिक समस्याको बारेमा समेत छलफल भएको थियो । अहिले विश्वमा चलिरहेको व्यापार युद्ध, बाट नेपालमा पर्ने असरलाई पनि न्युनीकरण गर्नेगरी मौद्रिक नीति ल्याउनुपर्ने सुझाव बैठकमा आएको थियो । अहिले नेपालको वित्तीय क्षेत्रमा केही समस्या रहेको भन्दै यसको समाधानको लागि के गर्ने भन्ने बारेमा पूर्व गभर्नरहरुले केही सुझाव दिएका छन् । 'बैंकहरुको मर्जबारे पनि छलफल भएको भन्दै थापाले अहिले विश्वव्यापी रुपमा देखिएका आर्थिक समस्याबाट नेपाललाई प्रभावमुक्त गराउने सहयोग पुग्नेगरी मौद्रिक नीति तयार पार्नुपर्नेमा जोड दिईएको छ ।' थापाले भने । 

अर्को तर्फ कार्यक्रममा सहभागी नभएका पूर्व गभर्नर दीपेन्द्र बहादुर क्षेत्रीले गभर्नर चिरञ्जीवी नेपालले अहिले लिएको नीतिमा आफ्नो केही भिन्न मत रहेको बताए । क्षेत्रीले गभर्नर नेपाललाई आफूले सुपरीवेक्षण र निरीक्षणमा निर्ममताका साथ लाग्न सुझाव दिएको बताए । आफू विशेष कामले पोखरा आउनु परेकोले कार्यक्रममा सहभागी हुन नसकेको बताए । 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ