एमालेको छुट्टै छलफल, निरीह देखिए प्रचण्ड 

बालुवाटारमा धुम्बाराही हेडक्वार्टरको बैठक, धङधङी बल्खुको, तरंग देशैभर 

प्रकाशित मिति : २०७६ श्रावण ५ आइतबार
तस्वीर –फाइल

काठमाडौं । पार्टी एकीकरण भएको १४ महिनासम्म पनि नेपाल कम्युनिष्ट पार्टी (नेकपा) एकताको बाँकी कामलाई पूर्णता दिन सकेको छैन । 

गत वर्षको जेठ ३ गते तत्कालीन एमाले र तत्कालीन माओवादी केन्द्रबीच पार्टी एकता हुँदा ३ महिनाभित्रै पूर्ण एकता गर्ने भनिएको थियो । तर त्यो दावी अहिलेसम्म पूरा भएको छैन । 

पछिल्लो समय अध्यक्षद्धय केपी शर्मा ओली र पुष्पकमल दाहाल ‘प्रचण्ड’ बीच भएको सहमतिअनुसार विभाग र केन्द्रीय सदस्यहरुको कार्य विभाजनको टुंगो लाग्ने दावी गरिएको छ । 

यसका लागि आइतबार बिहान ११ बजे प्रधानमन्त्री निवास बालुवाटारमा नेकपाको सचिवालय बैठक बस्दैछ । यो बैठकबाटै विभाग तथा आयोगका प्रमुख र केन्द्रीय सदस्यहरुको कार्यविभाजन गरेर देशव्यापी रुपमा कार्यक्रम सञ्चालन गर्ने पार्टी प्रवक्ता नारायणकाजी श्रेष्ठले बताएका छन् । 

उनले कतिपय विषयमा सहमति जुटिसकेको र केही विषयमा सहमति जुट्न बाँकी रहेको भन्दै सम्भवतः सचिवालय बैठकले बाँकी कामको टुंगो लगाउने समेत बताएका छन् । 

तर पार्टी मुख्यालय धुम्बाराहीमा बस्नुपर्ने बैठक बालुवाटार बस्दै आएकामा बल्खु (तत्कालीन एमालेको मुख्यालय) कार्यालयकै धङधङी बढी भएको आरोप लाग्न थालेको छ । 

महत्वपूर्ण मानिएका विभागमा तत्कालीन एमालेका नेताहरुकै हालीमुहाली चलेपछि यतिबेला पेरिसडाँडा (तत्कालीन माओवादीको मुख्यालय) स्तव्ध भएको बुझ्नामा आएको छ । 

जुटेको सहमति अनुसार संगठन विभागको प्रमुखमा वामदेव गौतम, विदेश विभाग प्रमुखमा वरिष्ठ नेता माधवकुमार नेपाल, नीति अध्ययन प्रतिष्ठानको प्रमुखमा अर्का वरिष्ठ नेता झलनाथ खनाल र रहने सहमति जुटेको बताइएको छ । 

स्कुल विभागमा भने तत्कालीन एमालेबाट ईश्वर पोखरेल र पूर्व माओवादीबाट नारायणकाजी श्रेष्ठको दावी रहेको छ । फेरि पनि हावी भने पोखरेल नै रहेको बुझिन्छ । 

एमालेको छुट्टै छलफल
आइतबार सचिवालय बैठक बसेर सबै विभाग र आयोगको टुंगो लगाउने दावी भइरहँदा पूर्व एमालेको छुट्टै बैठक शनिबार पनि बसेको छ । प्रधानमन्त्री एवं नेकपा अध्यक्ष ओलीको नेतृत्वमा बसेको बैठकमा एमालेका तर्फका सबै सचिवालय सदस्यहरु सहभागी रहेका थिए । 

यसरी गोप्य बैठक गत मंगलबारदेखि धेरै पटक बस्दै आएको छ । पार्टीभित्र बलियो पकड बनाएर त्यसपछि सरकार मिलाउन लाग्ने भन्दै ओलीले विद्रोही बनेर निस्केका गौतम, नेपाल र खनाललाई फकाउन सफल भएको स्रोतको दावी छ । 

एमालेका तर्फबाट सचिवालय सबै सदस्यले संगठन पाउने भए पनि अहिलेसम्म महासचिव विष्णु पौडेललाई दिने कुनै संगठन वा विभाग फेला परेको छैन । 

स्रोतका अनुसार सचिवालयमा रहेका अध्यक्षद्धय र महासचिवले विभागको जिम्मेवारी नलिने विषयमा मोटामोटी सहमति भएको थियो । तर अहिले पौडेललाई पनि जिम्मेवारी दिन खोजिँदा प्रचण्डलाई कुन भूमिका दिने भन्नेबारे चर्चा चलिरहेको छ । 

निरीह देखिए प्रचण्ड 
प्रचण्ड निरीह देखिएका छन् । उनमा खासै उत्साह पाइँदैन । उनले ओलीको चर्को आलोचना गर्र्दै आए पनि पार्टीभित्र भागबण्डाको सबालमा पकड जमाउन नसकेको आरोप छ । 

ओली नेतृत्वको सरकारको विरोध गर्ने बेलामा तत्कालीन एमालेका नेताहरुलाई साथ दिएका प्रचण्डलाई अहिले भने एक्लो भएको महसुस भइरहेको तत्कालीन माओवादीका एक नेताले बताए । 

उनका अनुसार एमालेका नेताहरुलाई अगाडि सार्ने काम प्रचण्डले गरे पनि अहिले भने उनीहरु एक ढिक्का हुन खोजेको देखिएको छ । उनले असन्तुष्टी पोख्दै भने, ‘अप्रत्यासित रुपले लगातार बैठकमा बसेका छन्, यो त हाम्रो पनि अपमान भयो, अझै पनि गुटलाई मजबुद पार्ने खालको मनस्थिति देखियो ।’

पूर्व एमालेबाट विभाग र आयोगको प्रमुख बन्नेहरुको नामावली तयार भए पनि प्रचण्डले भने तत्कालीन माओवादी केन्द्रको भागमा परेको विभाग प्रमुखको नामावली टुंगो लगाउन सकेका छैनन् । 

विभाग र आयोगको प्रमुख बन्ने आकांक्षीको संख्या धेरै हुँदा नाम टुंगो लाग्न नसकेको बताइएको छ । त्यसो त एकीकरण भएको लामो समय बितिसक्दा समेत प्रचण्डले अध्यक्षको हैसियतमा निर्वाह गर्ने भूमिकाको बारेमा समेत स्पष्ट हुन सकेको छैन । ती माओवादी निकट सदस्यले भने, ‘आफूले पनि भूमिका लिन सक्नुभएन हामीलाई पनि जिम्मेवारी दिन सक्नु भएन ।’

एकीकरणपूर्व अध्यक्ष ओलीले सरकार र अध्यक्ष प्रचण्डले पार्टीको जिम्मेवारी लिने सहमति भएको थियो । तर एकीकरणको १४ महिना बितिसक्दा समेत प्रचण्डको भूमिका तोकिएको छैन । 

प्रचण्डले यसअघि सार्वजनिक कार्यक्रममा भने कि सत्ता कि पार्टी चलाउन पाउनु पर्ने बताउँदै आएका छन् । ओलीबाट पटक पटक धोका पाएपछि उनले एकता गर्दाको सहमति समेत सम्झाउँदै आएका छन् । 

अहिले सचिवालय बैठकको निर्णयको प्रतिक्षा भइरहँदा देशैभर तरंग उठेको छ । बालुवाटरमा धुम्बाराहीको बैठक बसे पनि पेरिसडाँडाँभन्दा बल्खुकै प्रभाव बढी रहेको स्पष्ट छ । 

त्यो धङधङीले संगठन विभाग खोजेका प्रचण्ड खेमाका रामबहादुर बादललाई कस्तो प्रभाव पर्ला ? 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ