- सुन चाँदी दर
- विनिमय दर
- नेपाली पात्रो
- राशिफल
काठमाडौं । पूर्व राष्ट्रिय बक्सिङ खेलाडी कुश बस्नेतले १३ औं दक्षिण एसियाली खेलकुद सागका स्वर्णपदकधारी बक्सिङ खेलाडीहरुलाई गहिरो सम्मानसहित नगद पुरस्कार प्रदान गरेका छन् ।
बेलायतमा रहेका बस्नेतले बक्सिङ खेलप्रतिको माया प्रकट गर्दै खेलाडीहरुलाई हौसला प्रदान गर्नका लागि सम्मान पठाएका हुन् ।
बस्नेतले आफू काम विशेषले बेलायतमै रहे पनि आफ्नो मन नेपालमै रहेको र बक्सिङ खेलप्रति नै नजिक रहेको भन्दै देशको नाम राख्ने खेलाडीलाई हौसला प्रदान गर्न लागेको बताए ।
उनले खेलाडीहरुले जितेको त्यो स्वर्ण आफूले जितेजत्तिकै भएको भन्दै खुशी व्यक्त गरेका छन् ।
सागमा नेपालको पदक
काठमाडौंमा सम्पन्न १३ औं सागमा नेपालले बक्सिङबाट ३ स्वर्णपदक जितेको थियो । बक्सिङमा नेपालले सन् १९९९ मा भएको आठौं सागपछि पहिलो पटक स्वर्णपदक जितेको हो ।
नेपालले यसपटक ३ स्वर्ण, ६ रजत र ३ कास्य जितेको थियो ।
नेपालका लागि सनिल शाही, मीनु गुरुङ र भुपेन्द्र थापामगरले स्वर्ण जितेका थिए ।
कुशको सहयोग
कुश बस्नेतले स्वर्ण विजेतालाई जनही २५ हजार रुपैयाँसहित ७५ हजार रुपैयाँ पुरस्कार पठाएका छन् । उक्त रकम बिहीबार एक कार्यक्रमका बीच खेलाडीहरुलाई प्रदान गरिँदैछ ।
उनले सागका बेलामै पुरस्कार रकम घोषणा गरेका थिए । त्योसंगै मायाको चिनो पनि प्रदान गरिँदैछ ।
मध्यान्ह १२ बजे राष्ट्रिय खेलकुद परिषद राखेपको प्रचारप्रसार शाखामा राखेपका वरिष्ठ बक्सिङ प्रशिक्षक ओमकुमार मास्केको संयोजकत्वमा तीन जनै खेलाडीलाई पुरस्कार प्रदान गरिँदैछ ।