कोरोना भाइरसः भारतमा कोरोना संक्रमित घटे, यस्तो छ प्रभावित शीर्ष देशहरुको अवस्था

प्रकाशित मिति : २०७७ कार्तिक ३ सोमबार

काठमाडौं । विश्वभर कोरोना भाइरसका संक्रमितहरु लगातार तेस्रो दिनसम्म उत्कर्षमा पुग्दा शनिबारदेखि घट्दै गएका छन् । एकैदिन शुक्रबार अहिलेसम्मकै सबैभन्दा बढी संक्रमित देखिएका थिए । शुक्रबार एकैदिन मात्रै ४ लाख १२ हजार ९१७ जना संक्रमित थपिएका थिए ।  

बिहीबार त्यो दिनसम्मकै अहिलेसम्मकै बढी ३ लाख ९८ हजार ६०९ जना संक्रमित भेटिएका थिए । यसअघि बुधबार त्यो दिनसम्मकै सबैभन्दा बढी ३ लाख ८२ हजार १३८ जना संक्रमित थपिएका थिए । 

शनिबार भने ३ लाख ७२ हजार १२० जना संक्रमित थपिए । आइतबार अझै घटेर ३ लाख २४ हजार ९२६ जना मात्र संक्रमित थपिए । मृतकको संख्या पनि घटेर ३ हजार ९७१ मा आइपुगेको छ । 

आइतबार सबैभन्दा बढी फेरि भारतमै संक्रमित थपिएका छन् । लगातार दुई दिनसम्म अमेरिकाले भारतलाई पछाडि पारेको अवस्थामा शनिबारदेखि भारत अगाडि लागेको छ । आइतबार ५५ हजार ५११ जना संक्रमित थपिए । ५७८ जनाको मात्र ज्यान गयो । ज्यान गुमाउने संख्या लामो समयपछि भारतमा थोरै आएको हो । 

भारतमा संक्रमितको संख्या ७५ लाख ४८ हजार २३८ पुगेको छ । आइतबार ६५ हजार ४९६ जना कोरोनामुक्त हुँदा अहिलेसम्म यो संख्या ६६ लाख ५९ हजार ८९५ पुगेको छ । 

मृतकको संख्या १ लाख १४ हजार ६४२ पुगेको छ । सक्रिय संक्रमित पनि निकै घटेका छन् । सक्रिय संक्रमित ७ लाख ७२ हजार ४७५ रहेका छन् । 

शीर्ष स्थानको अमेरिकामा आइतबार ४४ हजार ९४० जना संक्रमित थपिँदा ४४८ जनाको ज्यान गयो । 

जाडो मौसम बढ्दै जाँदा यो संख्यामा अझै बढोत्तरी हुने स्वास्थ्य विशेषज्ञहरु बताउँछन् । निरन्तर यसरी संक्रमित बढ्दै जाँदा विश्वलाई नै थप चिन्तित बनाएको छ । 

युरोपेली राष्ट्रहरुमा पुनः संक्रमित बढिरहेका छन् । संक्रमणमुक्त भएकाहरुको रोगसमेत बल्झिएको छ । 

त्यस्तै फ्रान्समा २९ हजार ८३७, रुसमा १५ हजार ९९, ब्रजिलमा १० हजार ९८२, बेलायतमा १६ हजार ९८२, अर्जेन्टिनामा १० हजार ५६१ जना संक्रमित थपिए ।

विश्वकै ३५ औं स्थानमा आएको नेपालमा आइतबार २ हजार ९४२ जना संक्रमित थपिए । १२ जनाको मृत्यु हुँदा अहिलेसम्म मृतकको संख्या ७३९ पुगेको छ । 

विश्वभर अहिलेसम्म ४ करोड २ लाख ६८ हजार ४२७ जना संक्रमित भएका छन् । ११ लाख १८ हजार २७५ जनाको ज्यान गइसकेको छ भने ३ करोड १ लाख ११ हजार ४६२ जना कोरोनामुक्त भएका छन् । 

नयाँ