प्रचण्डले धुम्बाराहीमा बोलाएको सचिवालय वैठकमा भेला भए ५ जना

केपी सहित ४ जना अनुपस्थित

हाम्राकुरा संवाददाता,

प्रकाशित २०७७ कार्तिक २१ शुक्रबार

काठमाडौं। नेपाल कम्युनिष्ट पार्टी (नेकपा) विवाद बढिरहेका बेला कार्यकारी अध्यक्ष पुष्पकमल दाहाल प्रचण्डले पार्टी कार्यालय धुम्बाराहीमा सचिवालयको अनौपचारिक बैठक बोलाएका छन् । दाहालले शुक्रबार ३ बजे पार्टी कार्यालय धुम्बाराहीमा छलफलका लागि सचिवालयको अनौपचारिक बैठक बोलाएका थिए । नेकपा प्रवक्ता नारायणकाजी श्रेष्ठका अनुसार पछिल्लो समय पार्टीमा देखिएका समस्या समाधानका विषयमा छलफल गर्न अध्यक्ष दाहालले बैठक बोलाएको जानकारी दिए ।

पछिल्लो समय दाहालले अर्का अध्यक्ष तथा प्रधानमन्त्री केपी शर्मा ओलीलाई सचिवालय बैठक बोलाउनको लागि दबाब दिइरहेका थिए । तर ओलीले भने सचिवालय बैठकको आवश्यकता नरहेको भन्दै टार्दै आएका थिए । बिहीबार मात्रै दुई अध्यक्षबीच छलफल भएको थियो । सो छलफलमा समेत प्रचण्डले सबै कुरा सचिवालयमा गरौं भन्दा ओलीले नमानेपछि आफैले अनौपचारीक वैठक बोलाएका हुन् ।

पछिल्लो समय सचिवालयका ६ सदस्य प्रचण्ड समूहमा छन् । विवाद बढ्दै गएपछि दुई अध्यक्षबीचको सम्बन्ध तिक्ततापूर्ण हुँदै गएको छ । शीर्ष नेताहरुमा विवाद देखिएपछि दोस्रो र तेस्रो तहका नेताहरुले विवाद मिलाउने प्रयास गरिरहेका छन्।

बैठकमा प्रचण्डसँगै वरिष्ठ नेता झलनाथ खनाल, वरिष्ठ नेता माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठ सहभागी भएका छन्। प्रधानमन्त्री तथा अध्यक्ष केपी ओली सहित सरकारमा रहेका सचिवालय सदस्यहरु उपप्रधानमन्त्री ईश्वर पोखरेल, गृहमन्त्री राम बहादुर थापा बादल र अर्थमन्त्री बिष्णु पौडेल भने वैठकमा गएनन् ।