काठमाडौं । नेपालले १४ महिनापछि पहिलो पटक अन्तर्राष्ट्रिय क्रिकेट प्रतियोगिता खेल्दैछ । नेपालले घरेलु मैदानमै नेदरल्यान्ड्स र मलेसियालाई समावेश गरेर ट्राइसिरिज टी–२० क्रिकेट प्रतियोगिता आयोजना गरेको हो ।
कीर्तिपुरस्थित टियु क्रिकेट मैदानमा आयोजना हुने सिरिजको उद्घाटन खेलमा शनिबार नेपाल र नेदरल्यान्ड्स खेल्दैछन् । खेल दिउँसो १ः१५ बजे शुरु हुनेछ ।
नेपालमा अहिले मौसममा उतारचढाव आइरहेको हुनाले खेलमा वर्षा वाधक हुने आशंका पनि गरिएको छ । मौसम पूर्वानुमान महाशाखाले आइतबारसम्म नै मौसममा उतारचढाव आउने बताएको छ ।
बिहीबारदेखि हावाहुरीसहित काठमाडौंमा असिना–पानी पनि आएको छ ।
नेपाल ज्ञानेन्द्र मल्लको कप्तानीमा मैदान र नेदरल्यान्ड्स पिटर सिलारको कप्तानीमा मैदान उत्रने छ । बलियो टिम नेदरल्यान्ड्स नेपाललाई हराएर सुखद शुरुआत गर्ने लक्ष्यमा रहेको छ । नेपालले पनि घरेलु मैदानमा जितबाट शुरुआत गर्दैछ ।
नेपालको लागि नेदरल्यान्ड्स चिरपरिचित प्रतिद्वन्द्वी हो । नेपालले सर्वाधिक टी–२० नै नेदरल्यान्ड्सविरुद्ध खेलेको छ ।
हालसम्म नेपालले नेदरल्यान्ड्ससँग ८ खेल खेलकामा जम्मा दुई वटा मात्र जित निकालेको छ ।
यो प्रतियोगितामा नेपाली टिमका पूर्व कप्तान पारस खड्का हुने छैनन् । चोटका कारण पारस सिरिज बाहिर रहेसँगै उनको स्थान सन्दीप जोराले लिने बताइएको छ ।
यसअघि शुक्रबार तीन वटै देशका कप्तानहरुले ट्रफी सार्वजनिक गरेका थिए ।
नेपालको बाँकी खेल तालिका
डबल राउन्ड रोबिनमा हुने यो प्रतियोगितामा एक टिमले आपसमा दुई दुई खेल खेल्नेछ । त्यसपछि अंकको आधारमा शीर्ष दुईमा रहने टिमले उपाधिका लागि खेल्नेछन् ।
नेपालले सिरिजको दोस्रो खेलमा मलेसियासँग बैशाख ६ गते खेल्नेछ ।
तेस्रो खेलमा नेपालले नेदरल्यान्ड्ससँग बैशाख ७ गते खेल्नेछ ।
लिगको अन्तिम खेलमा नेपालले बैशाख ९ गते मलेसियासँग खेल्नेछ ।
फाइनल खेल बैशाख ११ गते हुनेछ ।
दर्शकका लागि
कोरोना भाइरसको महामारीबीच हुन गइरहेको यो प्रतियोगिताका लागि दर्शक भने सीमित रुपमा मात्र प्रवेश गर्न दिने नेपाल क्रिकेट संघ (क्यान) ले बताएको छ ।
खेल हेर्न दर्शकले १५० रुपैयाँको टिकट काट्नु पर्ने हुन्छ ।
