झापा । झापाको मेचीनगर नगरपालिका वडा नं १३ चारआलीस्थित पूर्व पश्चिम राजमार्गमा भएको सवारी दुर्घटनामा एक जनाको मृत्यु भएको छ । दुर्घटनामा ट्रकको ठक्करबाट मोटरसाइकल चालकको मृत्यु भएको हो ।
मंगलबार साँझ पूर्वबाट पश्चिमतर्फ जाँदै गरेको को २८ प ८८९१ नम्बरको मोटरसाइकललाई विपरीत दिशाबाट आएको मे १ ख ८११ नम्बरको ट्रकले ठक्कर दिँदा मोटरसाइकल चालकको मृत्यु भएको हो ।
दुर्घटनामा मोटरसाइकल चालक मोरङ पथरी शनिश्चरे नगरपालिका ९ निवासी २१ बर्षीय प्रवेश बयलकोटी घाईते भई उपचारको लागि बिर्तामोडस्थित बीएण्डसी अस्पताल पुर्याउना साथ उनको मृत्यु भएको जनाइएको छ ।
दुर्घटनामा परि सोही मोटरसाइकलमा सवार पथरी शनिश्चरे निवासी २२ वर्षीय सागर लिम्बुको मनकामना अस्पताल चारआलीमा उपचार भईरहेको जिल्ला प्रहरी कार्यालय झापाले जनाएको छ । हाल उनको अवस्था सामान्य रहेको बताइएको छ ।
दुर्घटना गराउने चालक झापा अर्जुनधारा २ निवासी ५६ बर्षीय सुमन दनुवारलाई ट्रकसहित नियन्त्रणमा लिएको प्रहरीले जनाएको छ ।
