'पार्टीलाई नै परिवार सम्झेर किसुनजीको राजनीतिक जीवन बित्यो'

हाम्रा कुरा

प्रकाशित २०७८ जेठ २८ शुक्रबार

काठमाडौँ । नेपाली काँग्रेसका संस्थापक नेता कृष्णप्रसाद भट्टराईलाई नैतिकता र मूल्य मान्यतामा आधारित राजनीतिका लागि बिर्सन नसकिनेमा जोड दिइएको छ । लोकतन्त्र संवाद केन्द्रले शनिवार जुम प्रविधिबाट आयोजना गरेको 'मूल्य र नैतिकतामा आधारित राजनीति र किसानजीको सम्झना' विषयक कार्यक्रममा विघटित प्रतिनिधिसभाका सांसद प्रदीप गिरीले राजकीय शक्ति दुरुपयोग गरेर धन कमाउनुभन्दा ठुलो अपराध केही हुन्न भन्ने दर्शनबाट पूर्व प्रधानमन्त्री भट्टराई निर्देशित भएको बताए 'किसानजीको यो नैतिकताको स्रोत आध्यात्मिकता हो, पार्टीलाई नै परिवार सम्झेर उनको राजनीतिक जीवन बित्यो, आफूसँग असहमत हुनेसँग पनि कुरा गर्ने प्रजातान्त्रिक संस्कार उनमा थियो'–समाजवादी चिन्तक उनले भने ।

दुई पटक प्रधानमन्त्री भएर बालुवाटारबाट निस्कँदा पनि किसानजीले छाता, सुराही र पुरानो ट्याङ्का लिएर निस्कनु नै उनको बिम्ब बनेको कार्यक्रमका वक्ताको भनाइ थियो । कार्यक्रममा वरिष्ठ पत्रकार युवराज घिमिरेले वर्तमान जटिल राजनीतिक परिस्थितिमा देशको राजनीतिक सार्वभौमसत्ता सुरक्षित राख्न किसानजीको दर्शनअनुसार चल्न नेतृत्वलाई सुझाव दिए ।

पूर्व सचिव कृष्ण ज्ञवालीले अन्तरिम कालमा प्रधानमन्त्री बन्दा किसानजीले राजदरबारमा पठाउने पत्रमा त्यसअघि लेख्ने गरिएको 'सरकारको अनन्य भक्त' का स्थानमा 'सरकारको हितैषी' लेख्ने परम्पराको शुरुआत् गरेको स्मरण गराए ।

कार्यक्रममा कृष्णप्रसाद भट्टराई फाउन्डेसनका महासचिव विनोदकुमार भट्टराईले सन्त नेता किसुनजीका विषयमा हालसम्म प्रकाशित नभएका विषय राखेर पुस्तक प्रकाशनको अन्तिम चरणमा पुगेको जानकारी दिए ।

सो अवसरमा, पूर्व सांसद हीरादत्त भट्ट, नेपाल बार एसोसिएसनका पूर्व अध्यक्ष शेरबहादुर केसी, डा पूर्णकान्त अधिकारी, काठमाडौँ काँग्रेसका नेता राजन केसी, केन्द्रका नारायण भट्टराई र प्रदीप शर्मालगायतले नेपालको राजनीतिलाई सदाचारयुक्त बनाउन किसानजीको योगदानका विषयमा प्रकाश पारेका थिए ।