नवलपुर । मोबाइल तस्करी प्रकरणमा लुम्बिनी प्रदेश प्रहरी प्रमुख मुकुन्दराज आचार्यको समेत संलग्नता रहेको भन्दै प्रतिनिधि सभाको बैठकमा आचार्यलाई कारबाहीको माग गरिएको छ । गत साउन २२ गते रातको ११ बजेको समयमा नवलपुर प्रहरीले चितवनका अर्जुन ढकाल र ईन्द्रलाल श्रेष्ठलाई ५९५ थान विभिन्न मोडलका मोबाइल सहित दुम्किबासबाट पक्राउ आवश्यक कारबाहीका लागि गरेर महेशपुर भन्सार पठाएको थियो ।

 बरामद गरिएको मोबाइल र पक्राउ परेको व्यक्तिहरूलाई छुटाउन राजनीतिक रूपबाट ठुलो दबाब आएको कुरा बाहिर आइरहँदा बिहीबारको प्रतिनिधि सभाको बैठकमा बोल्दै प्रतिनिधि सभा सदस्य एवं काङ्ग्रेस नेता देवेन्द्र राज कँडेलले लुम्बिनी प्रहरी प्रमुख मोबाइल तस्करी काण्डमा मुछिएको र इलाका प्रहरी कार्यालय नवलपरासी बर्दघाटका प्रहरी निरीक्षक कपिल वाग्लेको मृत्युको कारक भएको भन्दै भ्रष्ट्राचार निवारण ऐन २०६९ को दफा २ क ७१८ बमोजिम भ्रष्ट्राचार हुने कसुर समेत गरेको भन्दै कारबाही गर्न माग गरेका हुन् । 

प्रतिनिधि सभाको बैठकमा सांसद कँडेलले व्यक्त गरेको घटना विवरण : 
साउन २२ गते नवलपरासी पश्चिम बर्दघाटमा प्रहरी चेकजाँचका क्रममा ५ सय ९५ थान मोबाइल सहित २ जनालाई पक्राउ गरेको थियो । प्रदेश नम्बर ३ ०१ ०२३ च ५५४४ को सेतो पिकअपमा उनीहरूले अवैध मोबाइल तस्करी गरेर ल्याएका थिए । उनीहरूलाई इलाका प्रहरी कार्यालय बर्दघाटमा आवश्यक कारबाहीका लागि राखिन्छ । चोरी पैठारी गरेको ल्याएको मोबाइल र सवारी साधनलाई महेशपुर भन्सार पठाउने प्रक्रिया पूरा नहुँदै ३ घण्टापछि पक्राउ व्यक्तिलाई छाडिएको थियो । 

प्रहरीले छोडेपछि लुम्बिनी प्रदेशको सिमाना काट्दै दाउन्ने हुँदै गण्डकी प्रदेशको दुम्कीबासमा इलाका प्रहरी कार्यालय कावासोतीले चेकजाँच गर्ने क्रममा अघिल्लो दिन बर्दघाट प्रहरीले छोडिदिएको मोबाइलसहित २ जना पक्राउ पर्छन् । 

जिल्ला प्रहरी कार्यालय कावासोतीले सोधपुछ गर्दा घुमुवा प्रहरी सञ्जीव धमलाको बर्दघाट वाणिज्य बैङ्कको खातामा १३ लाख रुपैयाँ बुझाएपछि छाड्ने निर्देशन आएपछि छाडिएको बताउँछन् । घटना सार्वजनिक भएपछि ती प्रहरी जवानलाई निलम्बन गरियो । साउन २२ गते जिल्ला प्रहरी कार्यालय कावासोतीले कानुनी प्रक्रिया पूरा गरी पक्राउ गरिएका सामान र व्यक्तिलाई महेशपुर भन्सारमा बुझाएको थियो । 

पक्राउ गरिएको मोबाइलको मूल्य १ करोड ३३ लाख मूल्याङ्कन गरिएको छ । लुम्बिनी प्रदेशका प्रहरी प्रमुख डिआइजी मुकुन्द आचार्यले नवलपरासी जिल्ला प्रहरी कार्यालयमा एसपी भई काम गरेको अनुभव पनि रहेको छ । उनले आफू मातहत रहेका प्रहरी चौकीबाट मासिक निश्चित रकम उठाउने गरेको सांसद कँडेलले दाबी गरे । 

बर्दघाट इलाका प्रहरी कार्यालयका प्रमुख प्रहरी निरीक्षक कपिल वाग्लेले ८ वर्षसम्म अख्तियार दुरुपयोग अनुसन्धान आयोगमा काम गरेको र ८ बटा पुरस्कार पाएको कँडेलले बताए । वाग्लेले बर्दघाट क्षेत्रमा हुने चोरी पैठारी रोकी १ करोड १७ लाख राजस्व दाखिला गरेका कर्तव्यनिष्ठ इमानदार प्रहरी भएको उल्लेख गरे । 

साउन २१ गते घुस लिएर मोबाइल छाडेको विषय कसरी सार्वजनिक गरेको भनेर प्रहरी निरीक्षक वाग्लेमाथि माथिल्लो तहबाट मानसिक यातना दिएको र साउन २५ गते आफ्नो निलम्बनको पत्र आएपछि साँझ ६ बजेपछि आफ्ना मातहतका प्रहरीलाई जम्मा पारेर उनले–‘आफैले निर्देशन दिएर छोडाउने, अनि पछि मलाई नै फसाउने, कसैमाथि विश्वास गर्नुहुँदैन भाइहरू’ भनेर साँझ साढे ७ बजे कालो रङ्गको ब्याग लिई प्रहरी कार्यालयबाट निस्किएका थिए । प्रहरी कार्यालयबाट २ सय मिटर अगाडि राजमार्ग पुगेपछि लु १४ प ८७५८ निलो रङ्गको पल्सर बाइकको ठक्करबाट उनको निधन भएको सांसद कँडेलले सदनमा जानकारी गराए । उनले २२ वर्ष प्रहरीमा सेवा गरेको इमानदार प्रहरी भएको बताउँदै उनको लागि न्यायको माग गरे । 

सांसद कँडेलले मानसिक तनावमा रहेका उनले बाटो काट्दा सवारी दुर्घटनाबाट मृत्यु भएको देखिए पनि लुम्बिनी प्रदेश प्रमुख आचार्यले दिएको तनावका कारण मानसिक सन्तुलन गुमाई प्रहरी निरीक्षक वाग्लेको ज्यान गएको दाबी गरे । 

उनले मुलुकी अपराध संहिता २०७४ को दफा १ सय ८५ को कसुर र तस्करी समेतको कसुरमा तत्काल निलम्बन गरी उच्चस्तरीय छानबिन गरी तस्करी, आर्थिक लेनदेन समेतको कल डिटेल निकाली कारबाहीका लागि उच्चस्तरीय छानबिन समिति बनाउन सभामुख सापकोटालाई आग्रह गरेका छन्