होटेलको कोठाबाट रेड पान्डाको छालासहित ३ जना पक्राउ

हाम्रा कुरा

प्रकाशित २०७८ साउन २९ शुक्रबार

कपिलवस्तु । बाणगंगाबाट रेड पान्डाको छाला सहित तीन जना पक्राउ परेका छन् । लुम्बिनी प्रदेश प्रहरी अनुसन्धान समूह र जिल्ला प्रहरी कार्यालय कपिलवस्तुको संयुक्त टोलीले बाणगंगा नगरपालिका वडा नं.-४ सिद्धिपुरस्थित बराल होटेल रेस्टुरेन्ट एन्ड लजबाट झापाका तीन युवालाई पक्राउ गरेको हो ।

होटेलबाट रेड पान्डाको छालाको कारोबार गरेको अभियोगमा झापा बिर्तामोड नगरपालिका वडा नं. ५ शनिश्चरे बस्ने २९ वर्षीय खगेन्द्र पुरी, सोही स्थान निवासी ३२ वर्षीय आशिष् जोगी र २६ वर्षीय सौरभ राजवंशीलाई पक्राउ गरिएको कपिलवस्तु प्रहरीका प्रवक्ता एवं प्रहरी नायव उपरीक्षक धर्मराज भण्डारीले जानकारी दिए ।

होटेलको कोठा नं. १०४ मा २ वटा रेड पान्डाको छाला र एउटा पुच्छर सहित तीन युवा पक्राउ परेका हुन् । पक्राउ परेका ३ जनामाथि थप अनुसन्धान भइरहेको प्रदेश प्रहरी कार्यालयले जानकारी दिएको छ ।