काठमाडौं । पोर्चुगिच फुटबल खेलाडी क्रिष्टियानो रोनाल्डोले च्याम्पियन्स लिग फुटबलमा कीर्तिमान बनाएका छन् । इङ्गलिश क्लब म्यानचेस्टर युनाइटेडका फरवार्ड रोनाल्डोले सर्वाधिक धेरै च्याम्पियन्स लिग खेल्ने खेलाडीको कीर्तिमान बनाएका हुन् ।
च्याम्पियन्स लिग अन्तर्गत समूह चरणको खेलमा बुधबार राति युनाइटेडले स्पेनिश क्लब भिल्लारियलसँग खेलेसँगै रोनाल्डोले कीर्तिमान बनाएका हुन् ।
रोनाल्डोले च्याम्पियन्स लिगमा सबैभन्दा धेरै खेल खेलेर रेकर्ड बनाएका हुन् । उनले १७८ खेल खेलेका छन् । रोनाल्डोले स्पेनिश क्लब रियाल मड्रिडका पूर्व गोलकिपर इकर क्यासिलास (१७७) खेल) को कीर्तिमान तोडेका हुन् ।
यस्तो छ खेलको नतिजा
बुधबार रातिको खेलमा युनाइटेडले भिल्लारियललाई २–१ गोल अन्तरले हरायो । खेलको ५३ औं मिनेटमा एल्कासेरले गोल गर्दै भिल्लारियललाई अग्रता दिलाए ।
६० औं मिनेटमा टेलेसले गोल गर्दै १–१ को बराबरीमा ल्याए । इन्जुरी समयमा जेस्सी लिंगार्डको पासमा आकर्षक गोल गर्दै रोनाल्डोले खेल जिताए ।
समूह एफमा रहेको युनाइटेडले खेल जितेसँगै तेस्रो स्थानमा पुगेको छ । एटलान्टा ४ अंकसहित पहिलो तथा यंग ब्वाइज ३ अंकसहित दोस्रो स्थानमा छ ।
