सुर्खेत। कर्णाली प्रदेश प्रहरी कार्यालय सुर्खेतले दसैँ, तिहार तथा छठलगायत चाडपर्वलाई लक्षित गरेर प्रदेशभरि चार हजार प्रहरी परिचालन गरेको छ । प्रदेश प्रहरी कार्यालयले नेपालीहरूको महान् पर्व विजयादशमी, दीपावली तथा छठमा हुने अवाञ्छित तथा आपराधिक गतिविधि नियन्त्रण एवं सडक अनुशासन कायम गर्न चाडपर्व लक्षित सुरक्षा कार्य योजना ल्याएको हो । 

यस योजनाअन्तर्गत १० जिल्लामा एकएक कमाण्ड सेन्टर स्थापना गरी चार हजार ३५१ प्रहरी जनशक्ति खटाइएको कर्णाली प्रदेश प्रहरी कार्यालय सुर्खेतका प्रहरी प्रमुख प्रहरी नायब महानिरीक्षक गणेशबहादुर ऐरले जानकारी दिए ।

“नागरिकको शान्ति, सुरक्षालाई ध्यानमा राखेर हामीले सुरक्षा कार्य योजनाअन्तर्गत दुर्घटना न्यूनीकरण तथा सहज आवागमनका लागि सडक अनुशासन, बैंक, वित्तीय सङ्घसंस्था तथा आर्थिक कारोबार हुने स्थानहरूमा सुरक्षा व्यवस्था गरेको छौँ”, प्रहरी नायब महानिरीक्षक ऐरले भने, “चाडपर्वमा खेलिने जुवा तास, कौडा प्रवृत्तिको पूर्ण नियन्त्रण र चोरी तस्करी, लागु औषधको ओसारपसार नियन्त्रणका लागि तालिम प्राप्त कुकुरसहित जाँचको व्यवस्था गरिएको छ ।” 

त्यस्तै, महत्त्वपूर्ण सरकारी कार्यालय तथा प्रतिष्ठान, मठमन्दिरमा सुरक्षा व्यवस्था गरिएको जनाउँदै उनले खाद्यान्नलगायतका अत्यावश्यक वस्तुमा कृत्रिम अभाव हुन नदिन अनुगमन गरी सहज आपूर्तिको व्यवस्था गर्ने योजना अघि बढेको बताए । सार्वजनिक सवारीमा यात्रा गर्दा यात्रुलाई ठगिन नदिन, समान हराए खोजतलास गर्ने, पकेटमारी, चोरी, लुटपाट र ठगी नियन्त्रण तथा चाडपर्वको अवधिमा हुन सक्ने झैझगडा तथा सम्भावित विवादको रोकथाम गर्ने योजना प्रहरीले बनाएको छ ।

प्रदेश प्रहरी कार्यालयले तत्काल आइपर्ने घटनाको उद्धार तथा राहतका लागि उद्धार टोली व्यवस्था गरेको छ । त्यस्तै, अपराध नियन्त्रण तथा सवारी दुर्घटना नियन्त्रणका लागि आकस्मिक चेक प्वाइन्ट, मोबाइल, पैदल एवं मोटरसाइकल गस्ती तथा सिमानाकामा तालिम प्राप्त कुकुरसहित जाँचको व्यवस्था गरिएको छ ।

प्रदेश प्रहरी कार्यालयले चाडपर्व अवधिभरका लागि ११४ वटा क्विक रेस्पोन्स टिम परिचालन गरेको छ भने मादक पदार्थ सेवनसहित १२९ स्थानमा नियमित जाँचको  व्यवस्था गरेको छ । त्यस्तै, सिमानामा चोरी तस्करी नियन्त्रण गर्न नौ, ट्राफिकसहितको संयुक्त चेकिङ ४६, जुवा तास, चोरी, लुटपाट, झैझगडा नियन्त्रणका लागि ७० र राजमार्गमा स्कटिङ मोबाइल तथा पैदल गस्ती ३८७ स्थानमा गर्ने योजनाअनुरूप प्रहरीले काम अघि बढाएको छ । 

त्यसैगरी, सुरक्षा कार्य योजनाअन्तर्गत यात्रु सहायता कक्ष ३८, धार्मिक तथा पर्यटकीयस्थल र आर्थिक कारोबार हुने ९७, क्वारेन्टिन तथा आइसोलेसन केन्द्र १३, कर्डन सर्च एण्ड एम्बुस आठ, आकस्मिक सभा जुलुस, धर्ना कार्यक्रम हुने १३, लामो सवारी दूरीमा विशेष जाँच हुने १८ स्थान तोकी आवश्यकताअनुसार प्रहरी परिचालन गरिएको प्रदेश प्रहरी कार्यालयले जनाएको छ ।  

कर्णाली प्रदेश प्रहरी प्रमुख प्रहरी नायब महानिरीक्षक ऐरले दसैँ, तिहार तथा छठलगायतका पर्व जनताको सहानुभूति लिने अवसर भएको बताए । वर्षमा एक पटक आउने महान् चाडपर्वमा नागरिकले शान्ति र सुरक्षाका साथ मनाउने वातावरण निर्माण गर्नु प्रहरीको कर्तव्य भएको बताउँदै प्रहरी नायब महानिरीक्षक ऐरले यसबाट प्रहरीलाई जनताको सहानुभूति लिने अवसर मिल्ने बताए । “यो बेला सम्पूर्ण नेपालीहरूले खुसीयालीका साथ दसैँ तिहार मनाइरहँदा प्रहरी आफ्नो कर्तव्य पालना गरिरहेको छ”, उनले भने, “यो देख्दा नागरिकलाई प्रहरीप्रति सहानुभूति पलाउँला नि ?”

उनले थपे, “प्रहरीले नागरिकको शान्ति सुरक्षार्थ आफ्नो जीवन समर्पित गरेको छ । उनीहरूलाई राज्य भएको महसुस गराउनु हाम्रो प्रमुख दायित्व हो । तसर्थ यो अवधिमा मैले प्रहरी अधिकृतलाई बिदामा नबस्न निर्देशन गरेको छु ।” प्रहरी हाम्रा लागि भन्ने बुझेर नागरिकले आफू अनुशासित भई खुसीका साथ चाडपर्व मनाउन र अवाञ्छित गतिविधि हुन नदिने कुरामा सहयोग पुर्‍याउन उनले आग्रह गरे ।