पोखरा । माछापुच्छ्रे बैंकका संस्थापक अध्यक्ष सूर्यबहादुर केसीको अर्धकदको शालीक स्थापना गरिएको छ ।
पोखराको नयाँबजारस्थित माछापुच्छ्रे बैंकको कार्यालय परिसरमा केसीको शालीक स्थापना गरिएको हो ।
उक्त शालीकको एक समारोह बीच केसीकी धर्मपत्नी प्रेमकुमारी केसीले अनावरण गरिन् ।
शालीक काठमाडौंका कलाकार एवम् मूर्तिकार विकल प्रजापतिले बनाएका हुन् ।
२२ वर्ष अघि आफू संस्थापक अध्यक्ष रहेर पोखरालाई पर्यटन र आर्थिक क्षेत्रको केन्द्र बनाउनुपर्छ भनेर स्व केसीले माछापुच्छ्रे बैंक स्थापना गरेका थिए ।
उक्त अवसरमा पूर्व प्रहरी वरिष्ठ उपरीक्षक कृष्णबहादुर थापाले केसीको दूर दृिष्टकोणले मुलुकको आर्थिक तथा सामाजिक क्षेत्रलाई नेतृत्व गरेको बताए ।
बैंकका संचालक हरिभक्त सिग्देल (महेश) ले केसी भौतिक रुपमा हामी माझ नभए पनि सूर्यको प्रकाश जस्तै उहाँका विचारहरु संसारमा फैलिएको बताए ।
स्व. केसीका छोरा प्रकाश केसीले आफ्ना पिताजीको सोंच र विचारलाई समाजले ग्रहण गरेकोमा आभार व्यक्त गरे ।
माछापुच्छ्रे बैंकका अध्यक्ष डा. वीरेन्द्र महत्तो, बैंकका प्रमुख कार्यकारी अधिकृत सन्तोष कोइराला, बैंकका संचालक किरण केसी, रोशन केसी, निर्देशक जय मुकुन्द खनाल लगायतले केसीको शालीकमा पुष्प गुच्छा अर्पण गरेका थिए ।
बैंकर, उद्योगपति, समाजसेवी र राजनीतिज्ञका रुपमा परिचित केसीको २०७७ कात्तिक १८ गते निधन भएको थियो ।
