-
-
-
-
रौतहट । रौतहटमा सवारी दुर्घनामा परी एक जनाको मृत्यु भएको छ । फतुवा विजयपुर ११ हिमालीबासमा टिपरको ठक्करबाट मोटरसाइकलमा सवार खेदु चौधरीको मृत्यु भएको हो ।
मृतक खेदु चौधरी फतुवा विजयपुर ९ का माओवादी वडाकमिटी सदस्य रहेको माओवादी नगर अध्यक्ष अजय तिमल्सिनाले जानकारी दिएका छन् । आइतबार राति बा ३०प ८११५ नम्बरको मोटरसाइकललाई तीव्र गतिमा रहेको गुगल निर्माण सेवाको ना८ख ४२०२ नम्बरको टिपरले ठक्कर दिएको थियो ।
चौधरीको घटनास्थलमै मृत्यु भएको प्रहरीले जनाएको छ । घटना लगत्तै आक्रोशित स्थानीयहरूले निर्माण सेवाको दुई वटा टिपरमा तोडफोड गरेका थिए ।
टिपर चालक भने फरार रहेका छन् । चौधरीको शव पोस्टमार्टमको लागि जिल्ला अस्पताल गौर पठाइएको इलाका प्रहरी कार्यालय विजयपुरका प्रमुख एवं प्रहरी निरीक्षक विष्णु विश्वकर्माले बताए ।
यसैबीच दोषीलाई कारबाही र क्षतिपूर्ति को माग गर्दै सोमबार बिहान विजयपुर बजारमा स्थानीय नेता कार्यकर्ताले प्रदर्शन गरेका छन् ।
