प्रधानन्यायाधीश जबरा विरुद्धको महाभियोग प्रस्ताव पेश, चैत २ को बैठकमा छलफल
हाम्रा कुरा
प्रकाशित २०७८ फागुन २९ आइतबार
627
Shares
काठमाडौं । प्रधानन्यायाधीश चोलेन्द्र शमशेर जबरा विरुद्धको महाभियोग प्रस्ताव प्रस्तुत गरिएको छ । नेकपा माओवादी केन्द्रका प्रमुख सचेतक देवप्रसाद गुरुङले प्रतिनिधि सभाको बैठकमा पेश गरेका हुन् ।
उनले पछिल्लो समय प्रधानन्यायाधीश जबराले न्यायीक मान्यताको उल्लंघन गरेको, संविधान विपरीतका कार्यहरु गरेको, संवैधानिक परिषदको सदस्यको हैसियतले न्यायपालिका र कार्यपालिकामा समेत हस्तक्षेत्र गर्न खोजेको भन्दै महाभियोग लगाउनु परेको स्पष्ट पारे ।
उनले न्यायालयमा लागेको आरोपलाई टुङ्गो लगाउने काम व्यवस्थापिकाको भएको भन्दै फागुन १ गते महाभियोग प्रस्ताव दर्ता गराएको बताए । उक्त प्रस्ताव फागुन १ मा गुरुङसँगै कांग्रेस सांसद पुष्पा भुषाल र नेकपा एकीकृत समाजवादीका सांसद जीवनराम श्रेष्ठको प्रस्तावमा ९५ जना सांसदले समर्थन जनाइ पेश भएको थियो ।
उक्त प्रस्ताव पेश हुँदा एमालेका सांसदहरुको अवरोध कायमै रहेको छ ।
गुरुङले पेश गरेको प्रस्तावमा जबरामाथि विभिन्न २१ वटा बुँदामा आरोप लगाइएको छ । ती बुँदाकै आधारमा उनलाई महाभियोग लगाउनु पर्ने पनि भनिएको छ ।
यसअघि एमालेका चार सांसदसहित ११ सदस्यीय छानबिन समिति बनाइएको थियो ।
गुरुङ पेश गरेको उक्त प्रस्तावमा आगामी बैठकमा छलफल हुनेछ । चैत २ गते बुधबार दिउँसो १ बजे बस्ने गरी बैठक स्थगित भएको छ ।
