जनकपुर । नेकपा माओवादी केन्द्रका अध्यक्ष पुष्पकमल दाहाल प्रचण्ड आज जनकपुर आउँदैछन् । आसन्न स्थानीय तहको निर्वाचनलाई केन्द्रित माओवादी केन्द्रले जनकपुरमा आज मधेस प्रदेशस्तरीय प्रशिक्षण कार्यक्रम गर्न लागेसँगै सोही कार्यक्रमलाई सम्बोधन गर्न प्रचण्ड जनकपुर आउन लागेका हुन् ।
जनकपुरस्थित तिरहुतियामा आयोजना हुने प्रशिक्षण कार्यक्रमलाई उनले सम्बोधन गर्दै पार्टीलाई स्थानीय तहको निर्वाचनमा सशक्त बनाउन नेता कार्यकर्तालाई निर्देशन दिनेछन् । जनकपुरधाममा पहिलोपटक हुन लागेको प्रशिक्षण कार्यक्रममा करिब दुई हजार ५०० जना नेता तथा कार्यकर्ताको सहभागिता रहने माओवादी केन्द्र मधेस प्रदेशका अध्यक्ष प्रह्लाद बुढाथोकीले जानकारी दिए ।
सो प्रशिक्षण कार्यक्रममा माओवादी केन्द्रको मधेस प्रदेशमा रहेका केन्द्रीय सदस्यहरू, प्रदेश समितिका प्रतिनिधि, जिल्ला समितिका प्रतिनिधि, जनवर्गीय सङ्गठनका प्रतिनिधिलगायतको सहभागिता रहने जनाइएको छ । यो प्रशिक्षणलाई लिएर स्थानीय नेता कार्यकर्ताहरु उत्साही भएको बुढाथोकीले बताए ।
