काठमाडौं । स्थानीय तहको निर्वाचन आउँदैछ । चुनावका लागि दलहरुको तछाँडमछाड बढिरहेको छ । बैशाख ३० गते हुने स्थानीय तहको निर्वाचनका लागि निर्वाचन आयोगमा ७९ दल दर्तारत छन् ।
छ राष्ट्रिय दलको मान्यता पाएका दलहरु बाहेक अधिकांश दलहरुले सीमित क्षेत्रमा मात्रै उम्मेदवारी दिँदैछन् पकडको आधारमा । काठमाडौंंमा मात्रै राष्ट्रिय मान्यताप्राप्त बाहेकका ४० दलले उम्मेदवारी दिँदैछन् ।
सबैभन्दा कम मनाङ, मुस्ताङ र डोल्पामा राष्ट्रिय दलबाहेक पाँच दलले भाग लिँदैछन् ।
दलहरुको आम्दानी प्रायः खुल्दैन । तर मुख्यतयाः चन्दा मागेरै उनीहरुले पार्टी संचालन गरेको पाइन्छ । अझ दलका पनि विभिन्न संगठनले चन्दा आतंक फैलाएको मिडियामा आउने गरेको छ ।
लोकतन्त्र आइसकेपछि पनि अझै यो आतंक बन्द हुन सकेको छैन । पछिल्लो समय एक पीडित व्यवसायीले आफूलाई मोटो रकम मागिएको बताएका छन् ।
त्यतिमात्र हैन उनले उक्त संगठनका व्यक्तिको फोन नउठाएका कारण धम्कीसमेत खानु परेको छ ।
प्रसङ्ग हो नेपाल उत्पीडित जातीय मुक्ति समाजको । काठमाडौंमै केन्द्रीय कार्यालय भएको उक्त समाजले खुलेआम चन्दा मागेको छ र नदिँदा धम्कीसँगै गालीगलौजसमेत खानु परेको छ ।
उसले आसन्न चुनावमा अर्थपूर्ण उपलब्धि हासिल गर्ने उद्धेश्यका साथ आम नेपाली जनता सँगसँगै ५० औं लाख उत्पीडित दलित जनताको प्रमुख संगठन भएको नाताले देशव्यापी परिचालन भएको जनाएको छ ।
आर्थिक सहयोग सम्बन्धमा भन्दै उक्त संगठनले छैटौं राष्ट्रिय सम्मेलन यही जेठ १५ देखि १७ गतेसम्म कमलादीस्थित प्रज्ञा भवनमा आयोजना गरिरहेको जनाएको छ ।
जहाँ उल्लेख गरिएको छ कि उक्त सम्मेलनको उद्घाटन एमालेका अध्यक्ष केपी शर्मा ओलीले गर्दैछन् ।
त्यही एउटा सम्मेलनलाई सफल पार्नका लागि उक्त समाजले जनप्रतिनिधि संस्था, राष्ट्र सेवक, उद्योगी–व्यवसायी, समाजसेवी तथा समाजिक संघ संस्थाका व्यक्तिहरुलाई ‘विशेष आर्थिक सहयोग’ का लागि अनुरोधसमेत गरिएको छ ।
ती पीडित व्यवसायीका अनुसार उनले चन्दा नदिँदा धम्की बेहोर्नु परेको हो ।
उक्त समाजका केन्द्रीय अध्यक्ष जीतु गौतमले नै सहयोगका लागि पत्र काटेका हुन् । चन्दा माग्दा त्यसको रेस्पोन्स नगरेपछि राति राति फोन गरेर गालीगलौज गर्नुका साथै थर्काएर धम्कीसमेत दिइएको छ ।
