प्रदेश प्रहरी कार्यालयमा नोबेलको निःशुल्क स्वास्थ्य शिविर

हाम्रा कुरा

प्रकाशित २०७९ पुष ४ सोमबार

विराटनगर । विराटनगर महानगरपालिका–१६ रानीस्थित १ नम्बर प्रदेश प्रहरी कार्यालयमा निःशुल्क स्वास्थ्य शिविर सञ्चालन गरिएको छ । नेपाल प्रहरी श्रीमती संघ र विराटनगरस्थित नोबेल शिक्षण अस्पतालको सहकार्यमा एक दिने शिविर सञ्चालन गरिएको हो ।

प्रहरी कार्यालयको हाताभित्र सञ्चालित शिविरमा नोबेल अस्पतालका नाक, कान, घाँटी, आँखा, दाँत, छाला तथा यौन रोग, हाडजोर्नी तथा नशा, जनरल मेडिसिन, स्त्री रोग र फोक्सो रोगका विशेषज्ञ डाक्टरहरुको टोलीले स्वास्थ्य परीक्षण गरेको हो ।

शिविरमा २ सय ८५ जना पुरुष, ७६ जना महिला र १० जना बालबालिका गरी जम्मा ३ सय ७१ जनाको निःशुल्क स्वास्थ्य परीक्षण गरिएको नोबेलका प्रबन्धक नारायण दाहालले जानकारी दिए । जसमध्ये ९७ जनाको रक्त परीक्षण, ७५ जनाको ईसीजी र १ सय २ जनाको भिडियो एक्सरे गरिएको छ ।