काठमाडौँ। एनसेल आजियाटा लिमिटेडसँगको प्रमुख सहकार्यमा शिक़्वल फाउन्डेसनले आयोजना गरेको तीन दिने नेपालको सबैभन्दा ठूलो महिला ह्याकाथन ‘ह्याकिङ फर ह्युम्यानिटी’ सफलताका साथ सम्पन्न भएको छ। यस कार्यक्रममा देशका विभिन्न ठाउँबाट आएका ४८ सहभागीहरूले एकै ठाउँमा बसेर समाजका विभिन्न क्षेत्रका लागि उपयोगी हुने सोलुसन्सहरूमा काम गरेका छन्।

यस ह्याकाथनको अन्तिम दिन आइतबार सम्बन्धित समूहहरूको पिचिङ् पश्चात् विजयी समूहहरूको घोषणा गरिएको थियो। ह्याकनाथमा सहभागी १६ टिम मध्ये टिम कोड क्राफ्टर्सले नगद पुरस्कार रु १५०,००० सहित प्रथम पुरस्कार जितेको छ। टिम क्राफ्टर्सको सोलुसनले साङ्केतिक भाषा बुझ्न मद्दत गर्दछ। त्यस्तै पर्यटक क्षेत्र लक्षित सोलुसन बनाउँदै टिम सहयात्रीले दोस्रो स्थानमा रहन सफल भई रु १००,००० जित्न सफल भएको छ। ज्येष्ठ नागरिकलाई ध्यानमा राख्दै टिम पाईले बनाएको अर्लट सिस्टमले तेस्रो स्थान हासिल गर्दै रु ७५,००० जित्न सफल बनेको छ।

एनसेलका प्रमुख कार्यकारी अधिकृत एन्डी चोङले यस्ता ह्याकाथनले सूचना प्रविधि क्षेत्रका युवा र उत्साही महिलाहरूलाई आफ्ना नवीन सोचलाई वास्तविकतामा बदल्न र उनीहरूमा रचनात्मकता बढाउन सहयोग गरेको बताए। “यो कार्यक्रम महिलाहरूलाई सूचना प्रविधिको क्षेत्रमा आफ्नो वृत्ति विकास गर्नका लागि प्रेरणादायी साबित भएको छ। यसले महिला र नन–बाइनरी छात्राहरूलाई अवसरका साथै उनिहलाई आवश्यक प्लेटफर्म प्रदान गरेको छ।”

एनसेलले विविधता, समानता र समावेशीकरण अर्थात् डाइभर्सिटी, इक्विटी एन्ड इन्क्लुशन (डीईआई) प्रति आफ्नो प्रतिबद्धता अनुरूप महिलाहरूलाई सञ्चार तथा सूचना प्रविधि क्षेत्रमा प्रोत्साहन गर्ने प्रमुख उद्देश्य अनुरूप शिक़्वल फाउन्डेसनसँग ह्याकाथनका लागि सहकार्य गरेको थियो। गर्ल्स इन टेक र वुमन इन बिग डेटा साझेदारको रूपमा रहेको यस कार्यक्रमले डेभलपर्स, डिजाइनर्स र उद्यमीहरूलाई एक साथ नवीन सोलुसन्स्हरु विकासको लागि अवसर प्रदान गरेको थियो।

माघ २७ देखि २९ सम्म आयोजना गरिएको यस ह्याकनाथमा विभिन्न विषयहरूमा टक कार्यक्रम र कार्यशालाहरू आयोजन गर्दै सहभागी छात्राहरूलाई आफ्नो प्रोजेक्टको विकासको लागि चाहिने सिपहरू प्रदान गरियो। पहिलो दुई दिन आफ्नो सोलुसनमा काम गरी सहभागी टिमहरूले तेस्रो दिन आइतबार निर्णायक मण्डलसामु आफ्नो आइडियाको पिचिङ गरेका थिए। यस ह्याकनाथमा सहभागी हुँदा सहभागीहरूले विभिन्न क्षेत्रका विज्ञ व्यक्तित्वहरूबाट प्रशिक्षण पाएका थिए।

शिक़्वल फाउन्डेसनका सह–संस्थापकहरू आस्था शर्मा र मेलिशाा घिमिरेले सहभागी सबैलाई उहाँहरूको उत्साह र कडा परिश्रमको लागी कृतज्ञता व्यक्त गरे र आगामी ह्याकाथनको लागी तत्पर रहेको बताए। यस कार्यक्रमले सूचना प्रविधिमा रहेका महिला र नन–बाइनरी ह्याकरहरूलाई एक अर्कासँग सहकार्य गर्न र आफ्ना नवीन सोचलाई सोलुसन्समा परिवर्तन गर्न प्लेटर्फम प्रदान गरेको थियो।

महिलालाई लक्षित गर्दै आयोजना गरिएको यो नेपालकै ठूलो र पहिलो ह्याकाथन हो। यस्ता कार्यक्रमले सूचना प्रविधिको क्षेत्रमा महिलाहरूको प्रतिनिधित्व र आबद्धता बढाउँदै डिजिटल अर्थतन्त्रमा महिलाहरूको समान सहभागितालाई बढाउन मद्दत गर्दछ र समस्त समाज र अर्थतन्त्रलाई फाइदा पुर्‍याउँछ।