एसिया कपः भारत र पाकिस्तान भिड्दै, दुई हारसँगै बंगलादेश बाहिरियो

हाम्रा कुरा

प्रकाशित २०८० भदौ २४ आइतबार

काठमाडौँ । एसिया कप क्रिकेट अन्तर्गत आज भारत र पाकिस्तान भिड्दै छन् । खेल श्रीलंकाको कोलम्बोमा दिउँसो ३ः१५ बजे शुरु हुनेछ ।

समूह चरणमा पनि यी दुवै टिम एउटै समूहमा रहेका थिए । तर वर्षाले गर्दा पूरा हुन सकेको थिएन ।

यो खेलमा पनि वर्षा हुन सक्ने आँकलन भइरहेको छ ।

सुपर फोरमा भारतले पहिलो खेल खेल्दै गरेको हो । पाकिस्तानले भने पहिलो खेलमा बंगलादेशलाई हराएको थियो ।

यता, सुपर फोरमा लगातार दुई खेल हारेसँगै बंगलादेश एसिया कप क्रिकेटबाट एक खेलअघि नै बाहिरिएको छ ।

सुपर फोरको पहिलो खेलमा पाकिस्तानसँग पराजित भएको बंगलादेश दोस्रो खेलमा शनिबार राति श्रीलंकासँग हारेको हो ।

कोलम्बोमा भएको खेलमा बंगलादेश २१ रनले पराजित भयो । श्रीलंकाले पहिले ब्याटिङ गर्दै प्लेयर अफ द म्याच सदीरा समराविक्रामाको ९३ रनको मद्धतले ९ विकेटको क्षतिमा २५७ रन बनायो ।

जवाफमा बंगलादेशले ४८.१ ओभरमा अलआउट हुँदै २३६ रनमात्र बनाउन सक्यो । टहिड हृडोएले ८२ रन बनाए पनि टिमलाई जिताउन सकेनन् ।

यो हारले बंगलादेश भारतसँग खेल्नुअघि नै सुपर फोरबाट बाहिरिएको छ ।

सुपर फोरमा खेलेका १–१ खेलमा जित हासिल गर्दै पाकिस्तान र श्रीलंकाले २–२ अंक बटुलेका छन् । शीर्ष दुई टिमले उपाधिका लागि फाइनल खेल्नेछन् ।

पहिलो पटक एसिया कप खेलेको नेपाल र अफगानिस्तान भने समूह चरणबाटै बाहिरिएका थिए ।

नेपाल भारतसँग १० विकेटले र पाकिस्तानसँग २३८ रनले पराजित भएको हो । नेपाली टिमको निकै नै प्रशंसा भएको थियो । भारतविरुद्ध नेपालले २३० रन बनाएको थियो । पाकिस्तानले नेपाली बलर सामु ब्याटिङ गर्न निकै संघर्ष गर्नुपरेको थियो ।