काठमाडौँ । लामो समयदेखि रोकिएको नेपाल प्रहरीको सरुवा मंगलबार राति खुलेको छ । प्रहरी प्रधान कार्यालयले मंगलबार राति २३ जिल्ला इन्चार्जसहित ७८ जना प्रहरी उपरीक्षक (एसपी) हरूको सरुवा गरेको हो ।
सरुवा अनुसार झापामा मिलन केसीलाई पठाइएको छ भने धादिङमा गौतम केसीलाई सरुवा गरिएको छ । सर्लाहीमा कार्यरत प्रहरी उपरीक्षक प्रवीण धिताललाई नयाँ जिम्मेवारी दिइएको छ ।
उनलाई जिल्ला प्रहरी कार्यालय बर्दियामा सरुवा गरिएको छ । हिन्दू र मुस्लिमबीच तनाव भएपछि असोज २५ मा धिताललाई सर्लाहीमा पठाउने निर्णय गरिएको थियो ।
अहिले सर्लाहीमा दयानिधि ज्ञवालीलाई पठाउने निर्णय गरिएको छ । ज्ञवालाीले रुपन्देही सरुवा चाहेका थिए । नवराज कार्कीलाई मोरङमा सरुवा गरिएको छ ।
जिल्ला प्रहरी कार्यालय तनहुँमा अपिलराज बोहरा, पर्सामा कुमोध ढुंगेल, कैलालीमा पदम बहादुर विष्ट र काभ्रेपलाञ्चोकमा वसुन्धरा खड्कालाई सरुवा गरिएको छ ।
सिन्धुलीमा विनोद शर्मालाई पठाइएको छ । चितवनमा भावेष रिमाल गएका छन् । जिल्ला प्रहरी कार्यालय रुपन्देहीमा रञ्जित सिंह राठौर र महोत्तरीमा श्याम कुमार राईलाई सरुवा गरिएको छ ।
