केपी, शंकर, नारायणकाजी, वर्षमान, उपेन्द्र र रविबीच गठबन्धनको खाका
हाम्रा कुरा
प्रकाशित २०८० फागुन २० आइतबार
3.7k
Shares
तस्बिर – फाइल ।
काठमाडौँ । नेपाली कांग्रेससँग गठबन्धन गरेर संघीय संसदको निर्वाचनमा ३२ सीट हासिल गरेको माओवादी केन्द्रले निर्वाचनपछि एमालेलाई साथ लिएर सरकार बनाएको थियो ।
२०७९ पुस १० गते एमालेको काँधमा टेकेर प्रधानमन्त्री बनेका माओवादी केन्द्रका अध्यक्ष पुष्कमल दाहाल प्रचण्डले एक वर्षअघि रामचन्द्र पौडेललाई राष्ट्रपति बनाउने गरी कांग्रेस–माओवादीसहितको सत्ता गठबन्धन बनाउन सफल भएका थिए ।
त्यतिबेला कांग्रेस नेकपा एसलगायतका दलहरुले वाम लोकतान्त्रिक गठबन्धनमा आएको भन्दै सरकारमा प्रचण्डलाई प्रधानमन्त्रीको रुपमा स्वीकार गरेका थिए ।
अहिले भने गठबन्धन धरापमा परेको चर्चा छ । त्यतिमात्र होइन सरकार सञ्चालनमा अविश्वास चलिरहेको बेला बालुवाटारमा प्रधानमन्त्री प्रचण्ड र विपक्षी एमालेका नेता केपी शर्मा ओलीबीच भएको भेटघाटले कांग्रेस लगायतका सहयात्री दलहरुलाई झस्काएको छ ।
त्यतिमात्र होइन आइतबार दिउँसो नै अघिल्लो गठबन्धन बनाउने पात्रहरुबीच तीन घण्टासम्म सघन छलफल भएको विषयले मध्यरातमा झन् चर्चा पाएको छ ।
स्रोतका अनुसार रास्वपाका सभापति रवि लामिछानेसहितको एउटा टुकडीले एमाले अध्यक्ष ओलीलाई बालुवाटार पुर्याएको थियो ।
उता एमाले अध्यक्ष ओली, एमाले महासचिव शंकर पोखरेल, माओवादी उपमहासचिव वर्षमान पुन, वरिष्ठ उपाध्यक्ष नारायणकाजी श्रेष्ठ र जसपा अध्यक्ष उपेन्द्र यादव र लामिछाने सहभागी भएर आगामी गठबन्धनको एउटा खाका बनाएकोसमेत आइतबार राति चर्चा भएको छ ।
एमाले अध्यक्षसहितको बालुवाटर बैठक सकिएपछि एमाले नेताहरु आइतबार राति अबेर बालकोटमा भेला भएका थिए । वरिष्ठ उपाध्यक्ष ईश्वर पोखरेलसहित भेला भएका नेताहरुबीच सत्ता गठबन्धनमा देखिएको समस्या र टीआरसी विधेयकबारे छलफल गरेको थियो ।
एमाले नेताहरुबीच छलफल चलिरहेको बेला माओवादीको एउटा टोली बालकोट पुगेको पनि स्रोतको दाबी छ ।
