काठमाडौं । नेपालमा सवारी दुर्घटनाबाट दैनिक सात जनाको मृत्यु हुने गरेको तथ्याङ्क सार्वजनिक भएको छ । नेपाल प्रहरीको तथ्यांकअनुसार नेपालमा सवारी दुर्घटनाबाट सरदरमा दैनिक ७ जनाको मृत्यु हुने गरेको देखिएको हो । शुक्रबार नेपाल प्रहरीले आयोजना गरेको पत्रकार सम्मेलनमा तथ्याङ्क प्रस्तुत गर्दै केन्द्रीय प्रहरी प्रवक्ता भीमप्रसाद ढकालले सवारी दुर्घटनामा दैनिक ७ जनाको मृत्यु हुने गरेको बताए । 

उनले एक दिनमा ६५ वटा सवारी दुर्घटना हुने गरेको र ८३ जना घाइते हुने गरेको तथ्याङ्क प्रस्तुत गरे । उनले नेपालमा जम्मा ६२ लाख ३८ हजार ३०१ सवारी साधन दर्ता भएका र ट्राफिक प्रहरीको सङ्ख्या २ हजार ७७० जना रहेको उल्लेख गर्दै एउटा ट्राफिक प्रहरीले २ हजार २५२ वटा सवारी साधन हेर्नुपर्ने अवस्था रहेको बताए । विगत एक वर्षको अवधिमा ट्राफिक प्रहरीले जरिवाना बापत १ अर्ब ८६ करोड ५२ लाख २६ हजार १५४ रुपैयाँ राजश्व उठाएको पनि जानकारी दिए ।

उनले भने – ‘सडकको डाटा हेर्दा खेरी नेपालमा ७७ हजार ३०२.६८ किलोमिटर सडक रहेको देखिन्छ । त्यो सडकमा दर्ता भएका सवारी साधन ६२ लाख ३८ हजार ३०१ सवारी साधन जम्मा दर्ता भएको छ । हाम्रो ट्राफिक प्रहरी जम्मा २ हजार ७७० जना छ । दर्ता भएको सवारी साधनमा ट्राफिकको सङ्ख्या हेर्दा अनुपात एउटा ट्राफिकले जम्मा २ हजार २५२ सवारी साधन हेर्नुपर्ने देखिन्छ । घटनाहरू हेर्दा एक दिन भित्र ६५ वटा दुर्घटना हुने गर्छ । ८३ जना घाइते हुन्छ सरदर । एक दिनमा ७ जनाको मृत्यु भएको देखिन्छ सवारी दुर्घटनाबाट । हाम्रो ट्राफिक प्रहरीको सीमित जनशक्तिले पनि जम्मा २४ लाख ३१ हजार ५९३ लाई कारबाही गरिएको छ भने राजश्व १ अर्ब ८६ करोड ५२ लाख २६ हजार १५४ जरिवाना गरेर त्यति राजश्व उठाएको छ ।’

प्रहरीले २०७९ चैत्र १० गतेदेखि २०८० फागुन ३० गतेको अवधिसम्म ५९ हजार ६१ वटा मुद्दा दर्ता भएको बताएको छ । जसमध्ये सबैभन्दा धेरै १७ हजार ३९७ अपराधको मुद्दा काठमाडौँ उपत्यकाका जिल्लाहरूमा दर्ता भएको जनाइएको छ । सबैभन्दा कम कर्णाली प्रदेशमा १ हजार ९६५ अपराध दर्ता भएका छन् । केन्द्रीय प्रहरी प्रवक्ता ढकालका अनुसार देशभरमा बैङ्किङ कसुरका १३ हजार २७७ वटा मुद्दाहरू दर्ता भएका छन् । महिला तथा बालबालिका सम्बन्धी २१ हजार १९७ वटा घटनाहरू दर्ता भएको उनले बताए । जसमध्ये सबैभन्दा धेरै घरेलु हिंसाका १६ हजार ७४१ वटा निवेदन दर्ता भई ८ हजार ३४९ निवेदनहरू मिलापत्र भएको छ । जबरजस्ती करणीको मात्रै २ हजार ४६८ वटा मुद्दाहरू दर्ता भएको प्रहरीको भनाई छ । महिला तथा बालबालिका सम्बन्धी अपराधहरू सबैभन्दा धेरै मधेस प्रदेशमा दर्ता भएको प्रवक्ता ढकालले जानकारी दिए ।

त्यसै गरी एक वर्षको अवधिमा आत्महत्याका ७ हजार १९४ घटनाहरू दर्ता भएका छन् । कोशी प्रदेशमा सबैभन्दा बढी १ हजार ५३० वटा घटना दर्ता भएका छन् । अपहरण तथा जबरजस्ती करणी, जबरजस्ती करणी गरी कर्तव्य, मानव बेचबिखन तथा जबरजस्ती करणी जस्ता गम्भीर प्रकृतिका अपराधहरू ५ हजार १५० वटा दर्ता भएका छन् । सो प्रकारका घटनाहरू सबैभन्दा धेरै कोशी प्रदेशमा १ हजार ६६ वटा र सबैभन्दा कम गण्डकी प्रदेशमा ३१२ वटा दर्ता भएको प्रहरीले बताएको छ । त्यसै गरी लागु औषधको ४ हजार २८४ वटा मुद्दा दर्ता भई ६ हजार ५०८ जना प्रतिवादीहरूलाई पक्राउ गरिएको जनाइएको छ ।

प्रहरीले विभिन्न सामाजिक सञ्जाल तथा विद्युतीय माध्यममार्फत घटाइएका २१२ वटा विद्युतीय कसुर तथा साइबर अपराध दर्ता भएको जानकारी दिएको छ । एक वर्षको अवधिमा सहकारी संस्थामा भएका अनियमितता सम्बन्धी देशभरमा १४९ वटा मुद्दा दर्ता भई २७१ जना प्रतिवादीलाई पक्राउ गरिएको प्रहरीले जनाएको छ । सहकारी प्रकरणका १ हजार ११० जना प्रतिवादीहरू फरार रहेका छन् । त्यसै गरी अनुचित लेनदेन (मिटर ब्याज) सम्बन्धी १५२ वटा उजुरीहरू विभिन्न प्रहरी कार्यालयहरूमा परेकोमा १५ वटा उजुरीहरू दर्ता भई ६ वटा मिलापत्र भइसकेको र १४६ वटा अनुसन्धानको क्रममा रहेका छन् ।