काठमाडौँ । प्रधानमन्त्री पुष्पकमल दाहाल प्रचण्डले विश्वासको मत गुमाएका छन् । प्रतिनिधि सभामा पाँचौँ पटक विश्वासको मत लिने क्रममा प्रचण्डले आवश्यक १३८ मत पर्नेमा निकै कम मत पाए । २५८ सांसद उपस्थित भएकामा उनले मात्र ६३ मत पाए ।
विपक्षमा १९४ मत परेको छ । मत दिन्न भन्ने पक्षमा १ मत परेको छ । योसँगै उनको विश्वासको मत अस्वीकृत भएको छ । उनलाई माओवादीका ३२, रास्वपाका २१ तथा नेकपा एकीकृत समाजवादीका १० मत परेका छन् ।
उनले पहिलो पटक विश्वासको मत लिँदा २७५ मध्ये २६८ मत पाएका प्रचण्डले अन्तिम पटक विश्वासको मत लिँदा मात्र ६३ मत परेको हो । योसँगै प्रचण्ड सरकार पनि ढलेको छ ।
१९ महिना सरकारको नेतृत्व गरेपछि माओवादी केन्द्र अब प्रमुख प्रतिपक्ष दल बन्ने भएको छ ।
नेपाली कांग्रेस र नेकपा एमालेले सहकार्य गरेर सत्ता चलाउने सहमति गरेका छन् ।