पोखरा । तेस्रो पोखरा अन्तर्राष्ट्रिय क्रस कन्ट्री दौड प्रतियेगिताको तयारी अन्तिम चरणमा पुगेको छ।

पोखरा महानगरपालिका, नेपालस्थित चिनियाँ राजदूतावास, नेपाल पर्यटन बोर्ड र हिमालयन टुरिजम फोरम पोखराको संयुक्त आयोजनामा यही कात्तिक २४ गते प्रतियोगिता आयोजना हुने भएको हो।

हिमालयन टुरिजम फोरम, पोखराका अध्यक्ष विश्वशङ्कर पालिखेले प्रतियोगिताको तयारी अन्तिम चरणमा पुगेको जानकारी दिए। खेलकुदका माध्यमबाट दुई देशबीचको सम्बन्धलाई थप प्रगाढ बनाउनका लागि प्रतियोगिता महत्वपूर्ण बन्ने उनले विश्वास व्यक्त गरे।

प्रतियागितामा सहभागिताका लागि चीनको कुनमिङबाट १३४ जना सहभागी र समर्थक चार्टर्ड उडानमार्फत बिहीबार पोखरा विमानस्थलमा अवतरण भएका हुन्। 

प्रतियोगितामा चारवटा विधाका दौडमा १ हजार २ सय जना खेलाडीले सहभागिता जनाउने हिमालय टुरिजम फोरमका मिडिया संयोजक ई. प्रतीकराज पहारीले जानकारी दिए।

उनका अनुसार प्रतियोगिताको टिम समूहमा ५० किमी, च्यालेञ्ज व्यक्तिगत समूहमा ५० किमी, विद्यार्थी दौडमा ५ किमी र ह्याप्पी रन समूहमा २ किमी दौड हुने भएको छ। 

टिम समूहका विजेताले ४ लाख ५८ हजार रुपैयाँ, उपविजेताले ३ लाख ४३ हजार रुपैयाँ तथा तेस्रो हुनेले २ लाख २९ हजार २ सय रुपैयाँ पुरस्कार पाउनेछन्। 

त्यस्तै चौथो र पाँचौँ स्थान प्राप्त गर्नेले क्रमशः १ लाख ५२ हजार ८ सय रुपैयाँ र ९५ हजार ५ सय रुपैयाँ पुरस्कार प्राप्त गर्ने गरिने पहारीले जानकारी दिए। 

च्यालेन्ज व्यक्तिगततर्फ विजेता महिला र पुरुषले जनही १ लाख ५२ हजार ८ सय रुपैयाँ पाउनेछन् भने उपविजेताले १ लाख १४ हजार रुपैयाँ पाउनेछन्। 

तेस्रो स्थान प्राप्त गर्नेले ७६ हजार ४ सय रुपैयाँ पाउनेछन्। प्रतियोगितामा चौथोदेखि सातौँ स्थान प्राप्त गर्ने महिला तथा पुरुषलाई ३८ हजार २ सय रुपैयाँ प्रदान गरिनेछ भने आठौँदेखि दशौँ स्थान प्राप्त गर्ने खेलाडीलाई १९ हजार १ सय रुपैयाँ नगद प्रदान गरिनेछ। 

विद्यार्थीतर्फको प्रतिस्पर्धामा विजेताले ३० हजार जित्ने छन् भने उपविजेताले २५ हजार रुपैयाँ र तेस्रो स्थान प्राप्त गर्नेले २० हजार रुपैयाँ प्राप्त गर्नेछन्। प्रतियोगितामा चौथोदेखि छैठौँ स्थान प्राप्त गर्नेका लागि जनही १०/१० हजार रुपैयाँ प्रदान गरिनेछ।

ह्याप्पी रन समूहमा दौड पूरा गर्ने सबै खेलाडीलाई प्रमाणपत्र प्रदान गरिनेछ। यी सबै विधाका प्रतियागिताको पुरस्कारका लागि १९ लाख ३८ हजार १ सय पुरस्कार रहेको पहारीले जानकारी दिए।

कूल ५० किमी पर्वतीय दौड पोखराको लेकसाइडस्थित बाराहीघाटबाट शुरु भएर राष्ट्र बैंक चोक, ड्याम साइड, छोरेपाटन, फुस्रेखोला, रामदी, मट्टीखान, देउराली, फेदीखोला, दमगडे स्कुल, साल्मेडाँडा, रामकोट, कुविण्डे, उल्लेरी, थाप्ले, टाइगर हिल, काब्रे, पुम्दीभुम्दी, तालपारी, द बीच रेष्टुरेण्ट हुँदै पुनः बाराहीघाट आएर पूरा हुनेछ। 

टिम समूह दौडका लागि १७ वटा नेपाली र ४ वटा चिनियाँ समूह गरी २१ वटा समूह दर्ता भएको र यसमा ६३ जना खेलाडी दर्ता भएको पहारीले जानकारी दिए।

पत्रकार सम्मेलनमा नेपाल पर्यटन बोर्डका निमित्त प्रमुख कार्यकारी अधिकृत हिक्मतसिंह ऐरले पोखरासहित नेपाललाई पर्यटकीय रुपमा चिनाउन यो प्रतियोगिता महत्वपूर्ण बन्ने विश्वास व्यक्त गरे। 

नेपालका लागि चिनियाँ राजदूतावासका डिसिएम वाङ सिनले नेपाल र चीनबीचको युगौँदेखिको सम्बन्धलाई थप प्रगाढ बनाउन यो कार्यक्रमले थप योगदान गर्ने ​बताए। दुई देशका नागरिकबीचको सम्बन्धलाई यसले सुमधुर बनाउने उनको भनाइ छ। 

पोखरा महानगरपालिकाका कार्यवाहक प्रमुख मोतिलाल तिमल्सिनाले पोखरासहित समग्र राष्ट्रको पर्यटन प्रवर्द्धनका लागि प्रतियोगिता महत्वपूर्ण बन्ने बताउँदै दुई देशबीचको मैत्रीपूर्ण सम्बन्धलाई अझै मजबुत बनाउने धारणा राखे।