अपडेटः एकाएक बोर्डिङबाट उड्लै लाग्दा भिजिबिलिटी कम भएर विमानस्थल बन्द गर्नु परेपछि विमान नउडी रोकिएको छ ।

भैरहवा । सहकारी ठगी प्रकरणमा अनुसन्धानका क्रममा कास्की प्रहरीको नियन्त्रणमा रहेका राष्ट्रिय स्वतन्त्र पार्टी (रास्वपा) का सभापति एवं पूर्व गृहमन्त्री रवि लामिछानेलाई रुपन्देही ल्याइँदैछ । 

उनलाई पोखरा अन्तर्राष्ट्रिय विमानस्थलबाट भैरहवास्थित गौतमबुद्ध अन्तर्राष्ट्रिय विमानस्थल हुँदै बयानस्थल लगिने छ । कम भिजिबिलिटीका कारण बिहानदेखि उड्न नसकेको जहाज आवश्यक भिजिबिलिटी पुगेसँगै पोखराबाट जहाज उड्न लागेको थियो । 

रविलाई लिएको जहाज बोर्डिङ भैसकेको भए पनि एकाएक भिजिबिलिटी घटेपछि रोकिएको छ । पहिले यति एयरलाइन्सको जहाजमा आउने भनिए पनि ढिला हुने भएपछि बुद्ध एयरमा राखिएको थियो । 

तर बुद्धको विमान बोर्डिङ भएपछिसमेत उड्न नसकेपछि अब यतिमै जाने तयारी भइरहेको छ ।

भैरहवा ल्याएपछि उनलाई जिल्ला प्रहरी कार्यालयमा पुर्याएर सरकारी वकिलको कार्यालय लगी बयान लिइने छ । 

यता उनको रिहाइको माग गर्दै आएका उनका पार्टीका नेता कार्यकर्ताको विमानस्थल जाने सडकमा भीड जम्मा भएको छ । रास्वपाले बुटवलमा विरोध प्रदर्शन गर्दै गर्दा भैरहवा विमानस्थलमै पुगेका हुन् । 

भिडियो लिन र तस्बिर खिच्न आतुर संचारकर्मीलाई भने गौतमबुद्ध विमानस्थलमा प्रवेश दिइएको छैन । हर प्रयास गर्दा पनि सुरक्षा घेरा बनाएर संचारकर्मीलाई रोकिएको हो । 

उनलाई बिहान ७:४५ को उडानमार्फत पोखराबाट रुपन्देही लगिने भनिएको थियो । 

साथै उनलाई सरकारी वकिलको कार्यालयमा बयान सकेर आजै कास्की फर्काउने तयारी छ । यसअघि पूर्वडीआईजी छविलाल जोशीसँग दुई दिन लगाएर बयान लिइएको थियो ।

बुटवलस्थित सुप्रिम बचत तथा ऋण सहकारी संस्थाको रकम अपचलनको आरोपमा रुपन्देही जिल्ला अदालतले लामिछानेसहित १२ जनाविरुद्ध पक्राउ पुर्जी जारी गरेको छ ।

सो सहकारीको १४ करोड २९ लाख रुपैयाँ गोर्खा मिडिया नेटवर्कमा गएको बताइएको छ । जसमा एक करोड ९६ लाख लामिछानेकै नाममा र १४ करोड २९ लाख रुपैयाँ विभिन्न व्यक्तिमार्फत गोर्खा मिडिया नेटवर्कमा पुगेको संसदीय छानबिन विशेष समिति र प्रहरीको प्रतिवेदनमा उल्लेख छ ।

त्यसपछि जिल्ला प्रहरी कार्यालय रुपन्देहीले कास्की प्रहरीलाई पत्र पठाएर लामिछानेलाई उपस्थित गराइदिन सहयोग मागेको थियो । 

लामिछाने सहकारी ठगी, सङ्गठित अपराध तथा सम्पत्ति शुद्धीकरणको मुद्दामा कात्तिक २ गते साँझ काठमाडौँबाट पक्राउ परेका थिए ।

उनलाई कात्तिक ३ गते बिहान कास्की ल्याइएको हो । उनी सोही दिनदेखि कास्की प्रहरीको हिरासतमा छन् । उनलाई पछिल्लो पटक जिल्ला अदालत कास्कीले १३ दिन म्याद थपिदिएको छ ।

लाछिानेसँगै पूर्वडीआइजी जोशी, लिला पछाई र व्यवसायी रामबहादुर खनाल पनि कास्की प्रहरी हिरासतमै छन् ।

यसैबीच सभापति लामिछानेलाई रुपन्देही ल्याउँदै गर्दा रास्वपाले भैरहवामा प्रदर्शन गर्ने तयारी गरेको छ । सबै कार्यकर्तालाई बिहान ११ बजे भेला भइसक्न निर्देशन दिइएको थियो । 

रास्वपाको आन्दोलनलाई ध्यानमा राख्दै सुरक्षा व्यवस्था मजबुत बनाइएको प्रहरीले बताएको छ ।