मोहन वैद्यले थप उपचार गर्न विदेश जान मानेनन्, शिक्षण अस्पतालमै उपचार
हाम्रा कुरा
प्रकाशित २०८१ पुष १६ मंगलबार
2.4k
Shares
काठमाडौँ । क्रान्तिकारी कम्युनिस्ट पार्टीका महासचिव मोहन वैद्यले विदेशमा उपचार गर्न अस्वीकार गरेका छन् । विगत १६ दिनदेखि शिक्षण अस्पतालमा उपचाररत वैद्यले विदेशमा उपचार गर्न अस्वीकार गरेको उनको उपचारमा सहयोगी भूमिका खेलिरहेका नेता हरिभक्त कँडेलले बताए ।
हरेक वर्ष दम बल्झिएपछि उपचारका लागि विदेश जाने शुभेच्छुकले दिएको सुझावलाई महासचिव वैद्यले अस्वीकार गरेको उनको भनाइ छ ।
‘यहीँ नेपाल राम्रा र दक्ष चिकित्सकहरू हुनु हुँदोरहेछ, उपचारका लागि नै भनेर किन विदेश जानुपर्यो भनेर उहाँले कुरा गरेपछि यहीँ उपचार गरिरहेका छौं,’ उनले सञ्चारकर्मीसँग भने ।
दम बढेपछि उनी त्रिभुवन विश्वविद्यालय शिक्षण अस्पतालमा दुइ हप्ता बढी समय देखी उपचार गरिरहेका छन् । उनलाई दमसँगै निमोनिया देखिएपछि ५ दिनदेखि आईसीयूमा राखेर उपचार गरिरहेको कँडेलले जानकारी बताए ।
उनका अनुसार पार्टीले वैद्यको उपचारका लागि कँडेलको संयोजकत्वमा समिति नै गठन गरेर काम गरिरहेको छ ।
कडेँलका अनुसार उनको स्वास्थ्य अवस्थामा धेरै नै सुधार भइरहेको छ । उनका अनुसार यही अवस्था रहेमा चार–पाँच दिनपछि डिस्चार्ज गरिनेछ ।
