काठमाडौँ । इङ्गल्याण्ड विरुद्धको दोस्रो टी–२० क्रिकेटमा भारतले रोमाञ्चक जित हासिल गरेको छ ।
चेन्नईमा शनिबार राति भएको खेलमा भारतले २ विकेटको जित हासिल गरेको हो । १६६ रनको चुनौती भारतले १९.२ ओभरमा ८ विकेटको क्षतिमा पूरा गर्यो ।
७८ रन बनाउँदा ५ विकेट गुमाइसकेको भारतका लागि तिलक वर्माले ५५ बलमा अविजित रहँदै ७२ रन बनाएसँगै भारतले रोमाञ्चक जित हासिल गरेको हो । त्यस्तै रवि विष्नोईले ५ बलमा अविजित रहँदै ९ रन बनाए । वाशिंगटन सुन्दरले १९ रन जोडे । ब्रेडन कार्सले ३ विकेट लिए ।
यसअघि इङ्गल्याण्डले पहिले ब्याटिङ गर्दै ९ विकेटको क्षतिमा १६५ रन बनायो । कप्तान जोस बट्लरले ३० बलमा ४५ तथा अलराउन्डर ब्रेडन कार्सले १७ बलमा ३१ रन बनाए । भारतका लागि अक्षर पटेल र वरुण चक्रवर्थीले २–२ विकेट लिए ।
जितसँगै भारतले पाँच खेलको श्रृंखलामा २–० ले अग्रता लिएको छ । तेस्रो खेल मंगलबार राजकोटमा हुनेछ ।
