नेपाली महिला क्रिकेट टिमको फड्को, पहिलो पटक विश्वकप ग्लोबल छनोटमा
एक खेलअघि नै ग्लोबल छनोटमा, अब विश्वकप खेल्न १० टिममा शीर्ष चारमा पर्नु पर्ने
हाम्रा कुरा
प्रकाशित २०८२ जेठ ५ सोमबार
659
Shares
काठमाडौँ । नेपालले एक खेलअगाबै आसीसी महिला विश्वकप टी–२० क्रिकेटको ग्लोबल छनोटमा स्थान बनाएको छ । सोमबार सम्पन्न ‘सुपर थ्री’को पहिलो खेलमा नेपालले संयुक्त अरब इमिरेट्स (यूएई) लाई पाँच विकेटले पराजित गरेको हो ।
योसँगै एसियाबाट थाइल्यान्ड र नेपाल ग्लोबल छनोटमा पुग्न सफल भएका हुन् । अब नेपालले मंगलबार अन्तिम खेल थाइल्यान्डसँग खेल्नेछ। उक्त खेल दुवै टोलीका लागि अभ्यास मात्रै हुनेछ ।
नेपालले पहिलोपल्ट ग्लोबल छनोटमा स्थान बनाएको हो । अब विश्वकप पुग्न अन्तिम चरणको छनोट खेल्नेछ । उक्त छनोटमा १० टिमले प्रतिस्पर्धा गर्नेछन्। शीर्ष ४ टोलीले विश्वकपमा स्थान बनाउने छन् ।
यूएई–नेपालको खेल
यूएईले दिएको ११५ रनको लक्ष्य नेपालले अन्तिम तीन बल बाँकी रहँदा पूरा गरेको हो। नेपालकी कप्तान इन्दू बर्माले अविजित रहँदै सर्वाधिक ३० रन बनाइन् । २८ बल खेलेकी उनले दुई चौका प्रहार गरिन् ।
रुविना क्षेत्री बेलबासेले १८ बलमा तीन चौकासहित २३ रनको योगदान दिइन् । ओपनर सम्झना खड्का २१ र उपकप्तान पूजा महतो १३ रनमा आउट हुँदा रुबि पोद्दार ६ रनमा अविजित रहिन् ।
यूएईकी मेचेली बोथा, सुरक्षा कोत्ते, भैश्नवी महेश र ईशा ओझाले समान एक विकेट लिइन् ।
त्यसअघि बैंककस्थित टेर्डथाई क्रिकेट मैदानमा टस हारेर पहिले ब्याटिङ गरेको यूएईले निर्धारित २० ओभरमा ७ विकेट गुमाउँदै ११४ रन बनाएको थियो।
यूएईकी कप्तान ईशाले सर्वाधिक ३९ रन बनाइन् । ३९ बल खेलेकी उनले दुई चौका र एक छक्का प्रहार गरिन् । ओपनर तीर्थ शतिशले ३२ बलमा दुई चौकासहित २१ रनको वइगदान दिएकी थिइन् । उनीहरूबीच पहिलो विकेटका लागि ४५ रनको साझेदारी भएको थियो।
हिना होत्चान्डी २० र लावन्या केनीले १२ रन बनाइन्। नेपालकी मनीषा उपाध्यायले सर्वाधिक ४ विकेट लिइन्। चार ओभर बलिङ गरेकी उनले २० रन मात्रै खर्चिइन्।
कविता कुँवरले २ र राजमती ऐरीले १ विकेट आफ्नो नाममा लेखाइन्।
