चीनमा इन्टरनेट प्रयोगकर्ताको सङ्ख्या एक अर्ब १२ करोड नाघ्यो
हाम्रा कुरा
प्रकाशित २०८२ साउन ६ मंगलबार
651
Shares
काठमाडौँ । चाइना इन्टरनेट नेटवर्क इन्फर्मेसन सेन्टरले सोमबार सार्वजनिक गरेको एक रिपोर्ट अनुसार सन् २०२५ को जुनसम्ममा चीनमा इन्टरनेट प्रयोगकर्ताको सङ्ख्या १ अर्ब १२ करोडभन्दा बढी पुगेको छ। यो सङ्ख्या सन् २०२४ डिसेम्बरको तुलनामा उल्लेखनीय वृद्धि हो।
रिपोर्टले सन् २०२५ जुनसम्ममा चीनमा इन्टरनेट पहुँच ७९.७ प्रतिशत पुगेको जनाएको छ, जुन सन् २०२४ डिसेम्बरको तुलनामा १.१ प्रतिशत विन्दुले बढेको हो।
प्रतिवेदनअनुसार १४औँ पञ्चवर्षीय योजना अवधि (२०२१–२०२५) मा चीनले इन्टरनेट विकासमा उल्लेखनीय प्रगति गरेको छ। विशेषगरी, इन्टरनेटलाई थप समावेशी बनाउने प्रयासहरूले वृद्ध र ग्रामीण बासिन्दाहरू जस्ता प्रमुख समूहहरूलाई यस प्रगतिको फाइदामा साझेदारी गर्न मद्दत पुगेको छ।
सन् २०२५ जुनसम्ममा चीनमा ६० वर्ष वा सोभन्दा माथिका १६ करोड १० लाख इन्टरनेट प्रयोगकर्ताहरू थिए भने ३२ करोड २० लाख ग्रामीण क्षेत्रमा बसोबास गर्थे। यी समूहहरूमा इन्टरनेट पहुँच क्रमशः ५२ प्रतिशत र ६९.२ प्रतिशत पुगेको छ, जसले डिजिटल डिभाइड कम गर्ने दिशामा चीनको प्रगतिलाई देखाउँछ।
प्रतिवेदनमा चीनमा इन्टरनेटको निरन्तर विकासले चिनियाँ संस्कृतिलाई घरेलु र अन्तर्राष्ट्रिय रूपमा प्रवद्र्धन गर्न महत्त्वपूर्ण भूमिका खेलेको पनि उल्लेख छ। चिनियाँ अनलाइन साहित्य र खेलहरूको बढ्दो निर्यात, साथै लोकप्रिय वेब सिरिज र सम्बन्धित पर्यटन गन्तव्यहरूबीचको बढ्दो तालमेललाई यसको उदाहरणका रूपमा प्रस्तुत गरिएको छ।
