अप्रत्याशित नतिजा निकाल्दै इङ्गल्याण्डसँग भारतले गर्यो बराबरी, गिल र जडेजाको उत्कृष्ट प्रदर्शन
हाम्रा कुरा
प्रकाशित २०८२ साउन १२ सोमबार
758
Shares
काठमाडौं । भारतीय क्रिकेट टोलीले इङ्गल्याण्डविरुद्धको चौथो म्यानचेस्टर टेष्टमा अप्रत्याशित हारबाट जोगिँदै खेल बराबरीमा टुङ्ग्याएको छ। पहिलो इनिङ्समा ३११ रनले पछि परेर र दोस्रो इनिङ्सको सुरुवातमा नै शून्य रनमा दुई विकेट गुमाएपछि भारत दबाबमा थियो।
ओपनर केएल राहुलले ९० रन र कप्तान शुभमन गिलले १०३ रन बनाएर तेस्रो विकेटका लागि १८८ रनको महत्त्वपूर्ण साझेदारी गरे। यद्यपि, दुवै खेलाडी आइतबार अन्तिम दिन लन्चअघि आउट भए।
त्यसपछि, अलराउन्डर वासिङ्टन सुन्दरले १०१ रन र रवीन्द्र जडेजाले १०७ रन बनाएर पाँचौँ विकेटका लागि २०३ रनको अविजित साझेदारी गर्दै भारतलाई सुरक्षित स्थानमा पुर्याए। भारतले दोस्रो इनिङ्समा ४ विकेटको क्षतिमा ४२५ रन बनाएको थियो।
यो नतिजासँगै भारतले पाँच खेलको टेष्ट शृङ्खलामा बराबरी गर्ने आशा जीवितै राखेको छ। शृङ्खला बराबरी गर्न अब भारतले जुलाई ३१ बाट लन्डनको द ओभल स्टेडियममा सुरु हुने अन्तिम टेष्ट जित्नै पर्नेछ।
शुभमन गिलले यस शृङ्खलामा आफ्नो चौथो शतक प्रहार गर्दै कप्तानको रूपमा डेब्यु शृङ्खलामा सर्वाधिक शतक बनाउने पहिलो खेलाडी बनेका छन्।
उनले सर डन ब्रेडम्यान र सुनिल गावस्करको कीर्तिमान पनि बराबरी गरे। यस्तै, रवीन्द्र जडेजाले इङ्गल्याण्डमा एक हजार रन र ३४ विकेट लिने उपलब्धि हासिल गर्दै विदेशी पिचमा यस्तो गर्ने तेस्रो खेलाडी बनेका छन्।
