काठमाडौँ । अमेरिकी विदेशमन्त्री मार्को रुबियोले विश्वकै महत्वपूर्ण ऊर्जा जलमार्गका रूपमा रहेको हर्मुज जलमार्गमा इरानले कायम गरेको नियन्त्रणलाई संयुक्त राज्य अमेरिकाले ‘सामान्य’ रूपमा स्वीकार नगर्ने बताएका छन्।
उक्त सामरिक जलमार्गमा अमेरिका र इरानबीच गोली हानाहान भएको भोलिपल्ट विदेशमन्त्री रुबियोको यस्तो प्रतिक्रिया आएको हो। इरानले सो क्षेत्रमा आफ्नो पकड बलियो बनाउँदै लगेपछि अमेरिकाले त्यसप्रति गम्भीर आपत्ति जनाएको छ।
यसअघि गत फेब्रुअरी २८ मा इजरायल र अमेरिकाले इरानको राजधानी तेहरान लगायतका सहरहरूमा संयुक्त सैन्य आक्रमण गरेका थिए। उक्त आक्रमणमा इरानका तत्कालीन सर्वोच्च नेता अली खामेनी, वरिष्ठ सैन्य कमान्डरहरू र सर्वसाधारणको मृत्यु भएको थियो।
त्यसको प्रतिशोधस्वरूप इरानले इजरायल र मध्यपूर्वमा रहेका अमेरिकी सैन्य अखडाहरूमा श्रृंखलावद्ध मिसाइल तथा ड्रोन आक्रमण गर्दै आएको छ।
साथै इरानले विश्व व्यापारका लागि अत्यन्तै संवेदनशील मानिने हर्मुज जलमार्गमा आफ्नो नियन्त्रणलाई थप कडा बनाएको छ । जसका कारण विश्वव्यापी ऊर्जा आपूर्तिमा चुनौती थपिएको छ।
