दुई पक्षबीच छुट्टाछुट्टै अधिवेशन भएपछि विवाद उग्र, रास्वपा जिल्ला कार्यालयमा तालाबन्दी
हाम्रा कुरा
प्रकाशित २०८३ जेठ २२ शुक्रबार
415
Shares
काठमाडौँ । राष्ट्रिय स्वतन्त्र पार्टी (रास्वपा) धनुषामा नगर अधिवेशनको विषयलाई लिएर उत्पन्न आन्तरिक विवाद उत्कर्षमा पुगेको छ । गणेशमान चारनाथ नगरपालिकाको नगर अधिवेशनका क्रममा देखिएको विवाद समाधान नभएको भन्दै असन्तुष्ट कार्यकर्ताहरूले जनकपुरधामस्थित जिल्ला पार्टी कार्यालयमा तालाबन्दी गरेका छन् । पार्टी नेतृत्वले निर्वाचन आयोगको निर्देशन र आम कार्यकर्ताको भावनाविपरीत विवादित समितिलाई जबर्जस्ती आधिकारिकता दिन खोजेको असन्तुष्ट पक्षको आरोप छ ।
गणेशमान चारनाथ नगरपालिकामा दुई पक्षले छुट्टाछुट्टै नगर अधिवेशन गरेपछि विवादले उग्र रूप लिएको हो । नगर सभापति राकेश यादवले दुवै पक्षद्वारा गरिएका अधिवेशनहरू खारेज हुनुपर्ने अडान राखेका छन् । उनले दुवै अधिवेशन खारेज गरी नयाँ मिति तय गरेर निष्पक्ष रूपमा पुनः अधिवेशन गराउनुपर्ने माग अघि सारेका छन् ।
असन्तुष्ट पक्षका अनुसार पार्टीको केन्द्रीय निर्वाचन आयोगले २०८१ जेठ १९ गते अर्को सूचना नआएसम्मका लागि सो क्षेत्रको अधिवेशन स्थगित गर्न निर्देशन दिएको थियो । तर, उक्त निर्देशनको ठाडो अवज्ञा गर्दै प्रतिक नेपाल पक्षले एकलौटी रूपमा अधिवेशन अगाडि बढाएको उनीहरूको दाबी छ ।
जिल्ला कार्यालयमा तालाबन्दीमा उत्रिएका कार्यकर्ताहरूले पार्टीभित्र गुट–उपगुट सिर्जना भएको भन्दै गम्भीर चिन्ता व्यक्त गरेका छन् । नयाँ र वैकल्पिक राजनीतिको नारा दिएर आएको पार्टीभित्रै पुरानै प्रवृत्ति देखिनु दुःखद भएको भन्दै उनीहरूले केन्द्रीय नेतृत्वलाई तत्काल हस्तक्षेप गर्न आग्रह गरेका छन् ।
कार्यकर्ताहरूले जिल्ला नेतृत्व र केन्द्रले यो विवादको उचित र न्यायसङ्गत समाधान नखोजेसम्म तालाबन्दी नखोलिने र आन्दोलनका कार्यक्रमहरूलाई थप सशक्त बनाउँदै लैजाने चेतावनी समेत दिएका छन् । यस तालाबन्दीका कारण धनुषामा रास्वपाको दैनिक प्रशासनिक तथा सङ्गठन विस्तारका कार्यहरू प्रभावित भएका छन् ।
