रेनु दाहालले अध्यक्षता गर्दै आएको अस्पतालमा लामिछाने अध्यक्ष
प्रकाशित २०७६ माघ १५ बुधबार
251
Shares
चितवन । भरतपुर महानगरपालिकाकी प्रमुख रेनु दाहालले अध्यक्षता गर्दै आएको बिपी कोइराला मेमोरियल क्यान्सर अस्पताल भरतपुरले अध्यक्ष पाएको छ । क्यान्सर अस्पताल भरतपुरले १६ महिनापछि अध्यक्ष पाएको हो ।
क्यान्सर अस्पतालको अध्यक्षमा मन्त्रिपरिषद्को यही माघ १३ गतेको बैठकले डा निर्मल लामिछानेलाई नियुक्त गरेको हो ।
लामिछाने सोही अस्पतालमा वरिष्ठ मूत्ररोग विशेषज्ञका रुपमा कार्यरत छन्। उनी अस्पतालका उपनिर्देशक भएर काम गर्दै आएका छन् ।
स्वास्थ्य तथा जनसंख्या मन्त्रालयले बिपी कोइराला मेमोरियल क्यान्सर अस्पताल ऐन २०५३ अनुसार अध्यक्षका लागि डा लमिछानेको नाम मन्त्रिपरिषद्मा सिफारिस गरेको थियो। विकास समिति अन्तरगर्त सञ्चालित उक्त अस्पतालमा अध्यक्षको कार्यकाल ४ बर्षको हुनेछ ।
विसं २०७५ असोज ३ गतेदेखि अस्पतालको अध्यक्ष पद रिक्त थियो । तत्कालीन अध्यक्ष प्रकाशराज न्यौपानेको कार्यकाल सकिएसँगै अस्पताल नेतृत्व विहीन भएको थियो ।
यसअघि भरतपुर महानगरपालिका प्रमुख दाहालले अस्पताल सञ्चालक समितिको अध्यक्षता गर्दै आएकी थिइन् ।
