कोरोनाले दुई लाख १९ हजार संक्रमित, इटालीमा भयावह स्थिति
८ हजार ८१० को मृत्यु, ८४ हजार ११४ जनाको उपचार
प्रकाशित २०७६ चैत ६ बिहिबार
364
Shares
काठमाडौं । कोरोना भाइरस ( कोभिड–१९) बाट अहिलेसम्म ८ हजार ८ सय १० जनाको ज्यान गएको छ । चीनको वुहानबाट सुरु भएको यो भाइरसले चीनमा ३ हजार २ सय भन्दा बढीको ज्यान गएको छ ।
चीनमा ८१ हजार १३८ जना संक्रमित भएका छन् । ६० हजारको हाराहारीमा स्वस्थ्य भइसकेका छन् । उनीहरु उपचारपछि घर फर्केका छन् ।
इटालीको स्थिति भने भयावह भएको छ । इटालीमा मृतकको संख्या २ हजार ९७८ पुगिसकेको छ । यही गतिमा अगाडि बढ्दा इटालीले केही दिनमै चीनलाई उछिन्ने आंकलन गरिएको छ ।
इटालीमा ३५ हजार ७१३ जना संक्रमित भएका छन् । इरानमा १ हजार १३५ जनाको ज्यान गएके छ भने १७ हजार ३६१ जना संक्रमित भएका छन् । ४ हजार २५ जनामात्र उपचारपछि घर फर्केका छन् ।
स्पेनमा ६३८ जनाको ज्यान जाँदा १४ हजार ७६९ जना संक्रमित छन् । त्यस्तै फ्रान्समा १४८ जना, दक्षिण कोरियामा ९१ जना र बेलायतमा ७१ जनाको मृत्यु भएको छ । अमेरिकामा ६८ जनाको मृत्यु भएको छ ।
छिमेकी भारतमा ३ जनाको मृत्यु भएको छ भने १७१ जना संक्रमित भएका छन् । अहिलेसम्म १५८ देशमा कोरोना फैलिएको छ ।
नेपालमा १ जना संक्रमित फेला परेका छन् । धेरैमा आशंका गरिएको छ ।
