काठमाडौं। साउथ चाइना सी मा आआफ्ना दावी चलिरहँदा भारतले भने त्यसलाई विश्वको साझा सम्पत्ति भएको बताएको छ। भारतले विश्व समुदायलाई चाइना साउथ सी मा शान्ति र स्थायित्व कायम गर्न आह्वान गरेको छ।
भारतीय विदेश मन्त्रालयका प्रवक्ता अनुराग श्रीवास्तवले अन्तर्राष्ट्रिय जलमार्गमा वैध व्यापार र अन्य वैध गतिविधिका लागि स्वतन्त्र हुनुपर्ने कुरामा स्पष्ट रहेको बताएका छन्। साउथ चाइना सी का विषयमा चिनियाँ दाबीलाई अमेरिकाले खारेज गरिरहेको र यसका भारतको धारणा के हो भन्ने प्रश्न को जवाफमा प्रवक्ता श्रीवास्तवले यस्तो बताएका हुन्।
भारतीय धारणा सार्वजनिक गर्दै श्रीवास्तावले भने, 'हामीले विभिन्न फोरमहरुमा साउथ चाइना सीका विषयमा आफ्नो धारणा स्पष्ट पारेका छौं। २१ मे, २०२० पछि बारम्बार हामीले हाम्रो धारणा स्पष्ट गरेका छौं । साउथ चाइना सी विश्वव्यापी सम्पत्ति हो । त्यहाँ शान्ति र स्थायित्व हुनुपर्छ भन्ने हाम्रो धारणा रहेको छ । हामी स्पष्टरुपमा नेभिगसन स्वतन्त्र हुनुपर्ने र अन्तर्राष्ट्रिय कानुनको पालना अनुसार जलमार्गको प्रयोग गर्न पाउनुपर्ने पक्षमा दृढ छौं।'
हरेक विवादहरु शान्तिपूर्ण संवादमार्फत समाधान होस् भन्ने चाहेको उनले बताए । यो समस्या पनि कानुनसम्मत तरिका कुटनीतिक प्रक्रियाबाट कुनै शक्तिको जोखिम नहुने गरी संवादमार्फत समाधान होस् भन्ने पक्षमा छौं । यसअघि अमेरिकी विदेशमन्त्री माइक पोम्पिओले साउथ चाइना सीका स्रोतहरुमा चिनियाँ दाबीलाई खारेज गरेका थिए ।
