फिलिपिन्स । फिलिपिन्समा सरकारी सुरक्षाकर्मी र विद्रोहीका बीचमा भएको झडपमा परी कम्तीमा १२ जनाको मृत्यु भएको छ ।
मृत्यु भएकामध्ये दुई जना सुरक्षाकर्मी रहेको अधिकारीहरुले जानकारी दिएका छन् । त्यसैगरी घाइते भएका १३ जना पनि सुरक्षाकर्मी नै रहेका छन् ।
सेनाका प्रवक्ताले बिहीबार दिएको जानकारी अनुसार दक्षिणी फिलिपिन्सको मगुइन्डानाओ प्रान्तमा झडप भएको हो ।
फिलिपिन्सका लेफ्टिनेन्ट कर्णेल एन्होभिक एन्टिलानोले बाङसामोरो इस्लामिक स्वतन्त्रता सङ्ग्राम (बिआइएफएफ) का नेता हसन इन्डाल कहाँ छन् भन्ने पहिचान गरेर आक्रमण गरिएको बताए ।
स्थानीय समय अनुसार विहान ५.३० बजेतिर २० आतङ्ककारीहरुलाई लक्षित गरेर सुरक्षाकर्मीहरुले सुरक्षा कारबाही गरेको उनले जानकारी दिए ।
सुरक्षाकर्मीहरुले झण्डै छ घण्टा आक्रमण गरेको र त्यसपछि आक्रमण स्थगित गर्ने निर्णय गरेको थियो । एटीलानोले विद्रोहीतर्फका अरु धेरै घाइते भएको हुनसक्ने बताए ।
