कास्कीमा बैशाख मसान्तसम्म कडा निषेधाज्ञा, सवारी साधन चलाउन नपाइने
हरि पन्त,
प्रकाशित २०७८ वैशाख १९ आइतबार
654
Shares
पोखरा । कास्कीमा निषेधाज्ञाको समय थप गरिएको छ । यसअघि एक साता गरिएको निषेधाज्ञाको समयसीमा बढाएर बैशाख मसान्तसम्म पुर्याइएको छ ।
आइतबार सम्पन्न जिल्ला कोभिड १९ संकट व्यवस्थापन केन्द्रको बैठक पश्चात् जिल्ला प्रशासन कार्यालयले सूचना जारी गर्दै निषेधाज्ञाको समय थप गरेको जनाएको छ ।
यसअघिको निषेधाज्ञामा जोर विजोर प्रणालीमा सवारी साधन चलाउन पाइए पनि अबको निषेधाज्ञामा नपाइने प्रशासनले जनाएको छ ।
साथै यसअघि बिहान ५ बजेदेखि राति ८ बजेसम्म सञ्चालन भएका खाद्यान्न तथा किराना पसलहरु अबदेखि बिहान ५ बजेदेखि बिहान ९ बजेसम्म मात्र पाइने भएको छ ।
यसैगरी बैंक तथा वित्तीय संस्थाहरु राष्ट्र बैंकको निर्देशनअनुसार सञ्चालन हुने, पत्रकारहरुले सूचना विभाग तथा नेपाल पत्रकार महासंघको परिचय पत्रवाहकलाई छुट दिने र अत्यावश्यक सबै सवारीलाई सञ्चालन गर्न दिइने भएको छ ।
