बैतडी । गएराति देखिको वर्षाका कारण आएको पहिरोमा पुरिएर शुक्रबार बिहान दार्चुलामा दुईजनाको मृत्यु भएको छ । जिल्ला प्रहरी कार्यालय दार्चुलाका प्रहरी नायब उपरीक्षक सुशीलसिंह राठौरका अनुसार शुक्रबार बिहान घरमाथिबाट आएको पहिराले घर पुरिँदा मालिकार्जुन–८ भौतडी मुसेकाँडाकी वसन्ती धामीको मृत्यु भएको बताएका छन् ।
यस्तै, सर्मोली–४ बसौडीका ६० वर्षीय शिवदत्त पन्तको पनि पहिरोले घर पुरिँदा मृत्यु भएको छ । घरमा रहेको लत्ताकपडा, अन्नलगायत गाईवस्तुसमेत पहिरोले पुरेको जिल्ला प्रहरी कार्यालय दार्चुलाले जनाएको छ । पानी परिरहेका कारण उद्घारमा समस्या भएको बताइएको छ ।
अपी नगरपालिका–१७ धापमा पहिरोले घर बगाउँदा प्रेमसिंह महरकी श्रीमती बेपत्ता भएकी र नाम खुल्न नसकेको प्रहरीले बताएको छ । प्रहरीको टोली घटनास्थलतर्फ गएको बताइएको छ ।
उकु गाविसमा रहेको जौलजिवी प्रहरी चौकीमा पहिरो खस्दा प्रहरी चौकी सारिएको छ । बिहीबार राति प्रहरी चौकी भवनमा माथिबाट पहिरो आएपछि प्रहरी चौकी वन रेन्जपोस्ट कार्यालयमा सारिएको प्रहरी कार्यालय दार्चुलाले जनाएको छ ।
वर्षाले दार्चुलाका विभिन्न क्षेत्रमा पहिरो जानका साथै घर भत्किएका छन् । खरकडा–५ ओडीगाँउ, उकु–२ च्युरानी, उकु–९ पन्तवाली, हुनैनाथ–९ औतालेक, सर्मोली–२, भगवती–४, डाँडाकोट–८ लिमेतीलगायतमा स्थानमा पहिरो गएको प्रारम्भिक खबर आएको प्रहरीले बताएको छ । बिहीबार रातिदेखि परेको मुसलधारे वर्षाले दार्चुला जिल्लाभरिको जनजीवन कष्टकर बनेको छ । रासस
