चेल्सीसँग लिभरपुलको बराबरी, यस्तो छ सात खेलको नतिजा
हाम्रा कुरा
प्रकाशित २०७८ भदौ १३ आइतबार
658
Shares
काठमाडौं । इङ्गलिश प्रिमियर लिग फुटबलमा शनिबार सात खेल भएका छन् । जसमा तेस्रो चरणकै सबैभन्दा टक्करको खेलमा लिभरपुल र चेल्सीले बराबरी खेलेका छन् । त्यस्तै आर्सनलविरुद्ध म्यानचेस्टर सिटीले एकतर्फी खेलेको छ ।
लिभरपुल १० खेलाडीमा समेटिएको चेल्सीसँग बराबरीमा रोकिएको हो । लिभरपुलको मैदानमा भएको खेल १–१ गोलको बराबरीमा रोकिएको हो ।
खेलको २२ औं मिनेटमा काइ हाभर्टेजले हेडमार्फत गोल गर्दै चेल्सीलाई अग्रता दिलाएका थिए । पहिलो हाफको इन्जुरी समयमा मोहमद सलाहले पेनाल्टीबाट गोल गरेपछि लिभरपुल हारबाट जोगिएको हो ।
चेल्सीका डिफेन्डर रिस जेम्सले पेनाल्टी क्षेत्रभित्र हातले बल रोकेपछि लिभरपुलले पेनाल्टी पाएको थियो । रेफ्रीले जेम्सलाई रातो कार्ड दिँदै मैदानबाट बाहिर पठाएका थिए । जेम्सले साडियो मानेको प्रहार गोललाइनबाट हातको सहाराले बल क्लियर गरेका थिए ।
तर दोस्रो हाफमा १० जना खेलाडीमात्र रहेर खेलेको चेल्सीमाथि लिभरपुल हावी हुन सकेन र अन्त्यमा बराबरीमै रहन वाध्य भयो ।
आइतबार तीन खेल हुँदै–
बर्नली र लिड्स युनाइटेड (१८ः४५ बजे)
टोटनह्याम हट्सपर र वाट्फोर्ड (१८ः४५)
वुल्भरह्याम्पटन वान्डेरर्स र म्यानचेस्टर युनाइटेड (२१ःः१५ बजे)
अंक तालिका
३ खेलबाट ७ अंकसहित वेष्टह्याम, चेल्सी, लिभरपुल र एभर्टन क्रमशः पहिलोदेखि चौथो स्थानमा रहेका छन् ।
६ अंकबाट म्यानचेस्टर सिटी, टोटनह्याम, ब्राइटन र लेस्टर क्रमशः पाँचौंदेखि आठौं स्थानमा रहेका छन् ।
आर्सनल र नर्विच अंकविहीन हुँदै पुछारमा रहेका छन् ।
