रोनाल्डो फ्लप हुँदा युनाइटेड बराबरीमै, चेल्सी पुग्यो शीर्षमा
हाम्रा कुरा
प्रकाशित २०७८ असोज १७ आइतबार
336
Shares
काठमाडौं । इङ्गलिश प्रिमियर लिग फुटबलमा पोर्चुगिच चर्चित खेलाडी क्रिष्टियानो रोनाल्डो गोल गर्न असफल भएपछि म्यानचेस्टर युनाइटेड बराबरीमै रोकिएको छ । युनाइटेड घरेलु मैदानमै एभर्टनसँग १–१ गोलको बराबरीमा रोकिएको हो ।
युनाइटेडका लागि ४३ औं मिनेटमा मार्सियलले गोल गरेका थिए । ६५ औं मिनेटमा टाउनसेन्डले गोल गर्दै एभर्टनलाई बराबरीमा ल्इाए । रोनाल्डो ५७ औं मिनेटमा मैदानमा छिरे पनि कुनै चमत्कार गर्न सकेनन् ।
उनी १२ वर्षपछि यसै सिजन युनाइटेड आएका हुन् ।
चेल्सी भर्सेस साउथह्याम्पटन
चेल्सीले सहज जित निकालेको छ । घरेलु मैदानमा खेलेको चेल्सीले शनिबार राति भएको खेलमा साउथह्याम्पटनलाई ३–१ गोल अन्तरले पराजित गरेको हो ।
चेल्सीको जितमा टिमो वेर्नेर, बेन चिलवाल र ट्रेभो चालोभाले एक एक गोल गरे । साउथह्याम्पटनका जेम्स वार्डले एक गोल फर्काए ।
खेलको ७७ औं मिनेटमा जेम्सले रातो कार्ड पाएपछि साउथह्याम्पटन १० खेलाडीमा समेटिएको थियो ।
अंक तालिका
चेल्सी ७ खेलबाट १६ अंकसहित शीर्ष स्थानमा रहेको छ । एक खेल कम खेलेको रिभरपुलको १४ अंक छ । तेस्रो स्थानको म्यानचेस्टर युनाइटेडको ७ खेलबाट १४ अंक छ ।
चौथो एभर्टनको ७ खेलबाट १४ तथा पाँचौं ब्राइटनको पनि ७ खेलबाट १४ अंक छ । छैटौं म्यानचेस्टर सिटीको ६ खेलबाट १३ अंक छ ।
आइतबारका खेल
आइतबार चार खेल हुनेछन् । पहिलो चरणको बहुप्रतिक्षित खेलमा लिभरपुल र म्यानचेस्टर सिटी राति २१ः१५ बजे खेल्दैछन् । अन्य ३ खेल साँझ १८ः४५ मा शुरु हुनेछन् ।
