काठमाडौं । इङ्गलिश प्रिमियर लिग फुटबलमा चेल्सी शीर्ष स्थानमा कायमै रहन सफल भएको छ । शनिबार राति भएको खेलमा चेल्सीले ब्रेन्टफोर्डलाई पराजित गर्दै शीर्ष स्थानलाई कायमै राखेको हो ।
चेल्सीले १–० गोल अन्तरको मात्र जित निकाल्यो । चेल्सीको जितमा बेन चिलवेलले निर्णायक गोल गरे । तीन अंक जोडेसँगै चेल्सी शीर्ष स्थानमा पुगेको हो ।
चेल्सीको ८ खेलबाट १९ अंक भएको छ । दोस्रो स्थानको लिभरपुलको ८ खेलबाट १८ अंक भएको छ । लिभरपुलले गोलको वर्षा गर्ने क्रममा शनिबार रातिको खेलमा वाटफोर्डलाई ५–० गोल अन्तरले हरायो ।
लिभरपुलका लागि फर्मिन्होले ह्याट्रिक गर्दा सादियो माने र मोहम्मद सलाहले १–१ गोल गरे ।
क्रिष्टियानो रोनाल्डो रहेको म्यानचेस्टर युनाइटेड भने पराजित भएको छ । युनाइटेड लेस्टर सिटीसँग ४–२ गोल अन्तरले पराजित भएको हो । खेलमा रोनााल्डोले गोलसमेत गर्न सकेनन् ।
अन्य खेलमा वुल्भरह्याम्पटन वान्डेरर्सले एस्टन भिल्लालाई ३–२ गोल अन्तरले हरायो । म्यानचेस्टर सिटीले बर्नलीलाई २–० गोल अन्तरले हरायो ।
नर्विच सिटी र ब्राइटनले गोलरहित बराबरी खेले । साउथह्याम्टनले लिड्स युनाइटेडलाई १–० गोल अन्तरले हरायो ।
अंक तालिका
चेल्सी १९, लिभरपुल १८, म्यानचेस्टर सिटी १७, ब्राइटन १५, म्यानचेस्टर युनाइटेड १४, एभर्टन १४ अंकसहित पहिलोदेखि क्रमशः छैटौं स्थानमा रहेका छन् । न्यूकासल युनाइटेड ३, बर्नली ३ र नर्विच सिटी २ अंकसहित रेलिगेशन क्षेत्रमा छन् ।
