काठमाडौँ । आइतबार सफ्टवेयरमा आएको समस्याका कारण कारोबार हुन नसकेको धितोपत्र बजार आज भने करिब ४० अङ्कले वृद्धि भएको छ ।
नेपाल स्टक एक्चेन्जका अनुसार आज नेप्से परिसूचक ४० अङ्कले बढेर एक हजार ८४० विन्दुमा पुगेको छ । कुल १४७ कम्पनीकोे सेयर बजारमा आज रु दुई अर्ब २४ करोड दुई लाख नौ हजार ६२४ मूल्य बराबरको कारोबार भएको छ । कुल ४७ लाख ४० हजार ९७२ कित्ता सेयर कारोबार हुँदा जलविद्युत् समूहबाहेक अन्य समूहको भने सेयर कारोबार बढेको छ ।
तीन दिन लगातार बन्द भएर खुलेको सेयर बजारमा बैङ्किङ २.४८, होटल २.१२, विकास बैंक ४.६३, फाइनान्स २.४५, बीमा ०.९३, उत्पादन क्षेत्र ०.११ र अन्य समूहको सेयर १.०७ प्रतिशतले बढेको छ भने जलविद्युत् समूहको सेयर ०.४६ प्रतिशतले घटेको छ । लगातार बन्द भएको बजारलाई राजनीतिक घटनाक्रमले भने कुनै प्रभाव नपारेको बताइन्छ । रासस
